Barcelona dhe Lewandowski nuk do jenë bashkë sezonin e ardhshëm. Kështu duket të ketë vendosur Bayern Munich, pasi ka refuzuar ofertën që mund të jetë e fundit nga katalanasit për sulmuesin polak.
Barça ishte e gatshme të paguante 40 milionë euro plus bonuse për sulmuesin, i cili e kishte shprehur hapur dëshirën për t’u larguar. Në anën tjetër bavarezët kërkonin më shumë.
Dhe pse dëshira e tij nuk po pengohet nga klubi aktual, Lewandowski tregoi respekt. Plot 8 vite me Bayern Munich dhe shumë suksese nuk mund të mbylleshin me zemra të thyera. Kështu 33- vjeçari vendosi të mos e shfrytëzojë Nenin 17 në rregulloren e FIFA-s që e lejonte të largohej nga klubi pas njoftimit në një kohë të caktuar.
Nëse do aktivizohej, atëherë organi më i lartë i futbollit në botë do vendoste një çmim që Barça duhej ta paguante, në bazë të disa karakteristikave të lojtarit. Sigurisht që shumë herë më pak nga 40 milionë euro që katalanasit ofruan.
Periudha për aktivizimin e këtij neni ka kaluar dhe ishte vetë Lewandowski që vendosi të mos humbë respektin për klubin. Tashmë gjithçka ka kaluar dhe sulmuesit i duhet të vendosë nëse do presë dhe 1 vit për Barçën, apo do presë oferta nga një klub tjetër, pasi Barça nuk do përballonte një shumë më të lartë financiare.
Loading ...
