Kapiteni dhe qendërmbrojtësi i Kukësit Ylli Shameti beson se ardhja e sulmuesit Vasil Shkurtaj nuk do të ndikojë aspak negativisht në krisjen brenda ekipit, pasi verilindorët kanë në radhët një sulmues të kalibrit të lartë si Reginaldo.
Në një intervistë për "Supersport", 34-vjeçari u shpreh se çdokush që zgjedh Kukësin duhet të jetë i ndërgjegjshëm se klubi ka kërkesa dhe pretendime të mëdha.
"Përgatijet për rinisjen e sezonit? Faza në Turqi shkoi shumë mirë, nuk patëm dëmtime dhe luajtëm miqësore me ekipe shumë të forta që kanë yje në gjirin e vet. Normalisht që miqësoret nuk janë si ndeshjet zyrtare, por ne i vlerësojmë shumë takime të atilla dhe shpresoj të na ndihmojnë shumë për pjesën e mbetur të garës dhe realizimin e synimeve tona.
Afrimet? Normalisht, çdo futbollist kur ndërron klimë e ka pak të vështirë. Megjithatë fakti që si Rroca ashtu edhe Shkurtaj janë shqiptarë do t'ia bëjë më të lehtë, aq më tepër që edhe ambienti te Kukësi është shumë pozitiv.
'Bashkëjetesa' e Shkurtajt me Reginaldon? Nuk ka çështje, konkurrenca është rritur me ardhjen e Shkurtajt dhe normalisht më vjen mirë mua si lojtar me eksperiencë që Kukësi ka kualitete dhe askush nuk e do stolin. Kjo tregon se jemi një ekip me nivel të lartë. Ai ka bërë fazë shumë të mirë dhe mendoj se bashkë me Shkurtajn do të jenë dy lojtarë shumë të mirë, në të mirë të ekipit".
Merkato? Kukësi shquhet si një ekip surprizash dhe Shameti thotë se është pozitive kur ka afrime e sidomos kur janë cilësore, por... "Ndonjëherë të kthehen edhe kundër afrimet e janarit dhe dalin blof. Kështu që nëse ka një lojtar që presidenti dhe trajneri e mendojnë si të dobishëm, atëherë i shprehim mirëseardhjen.
Titulli? Të gjithë lojtarët që kanë ardhur dhe ata që do vijnë, duhet të dinë se po shkojnë te Kukësi. Po të jesh lartë edhe presioni është shumë i madh. Ndaj edhe ata duhet të dijnë që ne kemi një president shumë korrekt, por edhe shumë kërkues. Në dy fazat e para kemi bërë shumë gabime, por kemi rikuperuar dhe tashmë jemi në rrugë të mbarë për titullin edhe pse ka konkurrencë.
Rinovimi? Mendoj se duhet parë hap pas hapi. Aktualisht nuk përbën një çështje për mua rinovimi",saktësoi Shameti.
Lexo gjithashtu
