Të largohesh për pak ditë nga Shqipëria është një lluks i domosdoshëm për klubet e Superligës, të paktën për ato që garojnë për objektiva madhorë.
10-15 ditë përgatitore në Turqi gjatë muajit janar janë të nevojshme për skuadrat që duan të marrin ngarkesat e nevojshme fizike dhe të zhvillojnë 2-3 ndeshje për të marrë edhe ritmin e duhur para se të rinisë sezoni.
Kosto financiare për të prekur Turqinë në këtë periudhë nuk është e vogël. Ditët në hotel, ushqimi, terrenet sportive, transporti nga avion dhe transporti brënda në Antalia kushton. Në një hotel standart që përdoret nga klube të ndryshme europiane, për një futbollist duhet paguar 1 mijë euro.
Duke llogaritur se çdo skuadër merr me vete 23-25 lojtarë, shto dhe stafet teknike, në total kosto financiare prek shifrën e 30 mijë eurove. Klubet e Superligës po bëjnë llogaritë.
