Në prag të ndeshjes kundër Shqipërisë, sulmuesi i Italisë, Ciro Immobile ka folur në një konferencë për shtyp ku ka përmendur edhe bisedën që ka bërë me shokun e tij të skuadrës te Lacio, Thoma Strakoshën.
"Fola dje në telefon me Strakoshën dhe më tha: 'Do t'ua bëjmë shumë të vështirë', ndërsa unë iu përgjigja: 'Do të bëjmë gjithçka për t'iu mposhtur'. Më pas i kërkova Strakoshës të më zbulonte pak formacionin me të cilin do të luajë Shqipëria. Por, s'ma tregoi!
Kemi bërë disa batuta me Strakoshën gjatë ditëve të fundit në stërvitje me Lacion, ishte edhe Tare. Ndërkohë, ne po e studiojmë shumë mënyrën e lojës së Shqipërisë. Është një skuadër që ka vlera, që stërvitet mirë. Nuk do të jetë një shëtitje.
Nëse nuk japim 100%, nuk do t'ia dalim. Do të jemi agresivë, do tregojmë një lojë burrërore dhe sigurisht maturi. Pres që stadiumi në Palermo të na mbështetë maksimalisht", tha Immobile, i cili me skuadrën e Lacios në kampionat po kalon një formë fantastike dhe së bashku me Belottin e Torinos do të jenë rreziku më i madh për djemtë kuqezi të De Biasit.
