Shkodranët kanë filluar të projektojnë të ardhmen dhe përveç punës që janë duke bërë me ekipin e parë për të arritur Europën, ata i kanë kthyer sytë nga akademia.
Drejtuesit e klubit të futbollit “Vllaznia” kanë hedhur një tjetër firmë në kontratë me një futbollist të akademisë. Bëhet fjalë për Enes Isufi, i cili luan luan në repartin e mbrojtjes. Ai konsiderohet një futbollist me shumë perspektivë për të ardhmen, sepse është vetëm 16 vjeç dhe ka të dhëna shumë të mira. Kjo bëhet e ditur nga vetë klubi shkodran, në faqen e tij zyrtare:
“Drejtuesit e klubit të futbollit “Vllaznia” bëjnë realitet firmosjen e një tjetër kontrate me një futbollist të akademisë, që premton shumë për të ardhmen.
Bëhet fjalë për mbrojtësin Enes Isufi. Firmosja e kontratës me këtë futbollist është bërë pikërisht ditën e sotme, e cila me shumë të ngjarë do të mbahet mend gjatë në kujtesën e tij, pasi ka patur tre gëzime në një ditë.
Së pari, ka hedhur për të parën herë firmë në një kontratë si profesionist. Së dyti, po sot ka marrë ftesën për grumbullimin në kombëtaren U-19, dhe së treti, pikërisht në takimin e radhës për kampionat, atë ndaj Brians, ka qenë autor i njërit prej golave të fitores së ekipit U-19.
Të gjitha këto evenimente natyrisht që do ta bëjnë atë të ndihet mirë, por të mos harrojmë se kemi të bëjmë me një futbollist që ende nuk i ka mbushur 17 vjeç. Të dhënat e tij fizike dhe teknike janë evidentuar prej kohësh dhe jo më kot, drejtuesit e klubit kanë vendosur të firmosin kontratë me të.
Në këtë mënyrë, pas Pusit, Rajçeviq e Milotit, të ekipit U-19, dhe Lekajt e Repajt nga ekipi U-17, kontrata e Enes Isufit është e gjashta, që drejtuesit firmosin me elementët e perspektivës, duke bërë në këtë mënyrë “blindimin” e së ardhmes”.
Lexo gjithashtu
