Tifozët e skuadrës së Kategorisë së Parë ankohen për policinë dhe ekipin: Na morën në komisariat, nuk shkojmë më në stadium

Tifozët e skuadrës së Tërbunit janë ankuar përmes një statusi në faqen zyrtare të tifo-grupit “Shqiponjat e Veriut” për sjelljen e policisë së Pukës.

Në takimin e luajtur sot në stadiumin e Pukës, “Ismail Xhemali”, Tërbuni-Iliria 2-3, sipas tifozëve vendas, forcat e policisë kanë shoqëruar në komisariat disa sportdashës, të cilët kanë reaguar ndaj lojtarëve të Tërbunit. Kjo pasi futbollistët e skuadrës pukjane kanë qenë të acaruar me tifozët dhe kanë nisur edhe ata të ofendonin fansat e ekipit ku bëjnë pjesë.

Sipas asaj që shkruhet në postimin e bërë në faqen e tifo-grupit “Shqiponjat e Veriut” në Facebook, tifozët pukjanë tashmë do ta braktisin ekipin e tyre dhe nuk do ta ndjekin më në stadium.