Largimi i Nevil Dedes nga pankina e Tiranës ka sjellë reagime të shumta në opinionin sportiv. Si të mos mjaftonte situata e vështirë që po përjeton skuadra, një “furtunë” mediatike është drejtuar drejt klubit më të titulluar në Shqipëri. Ditën e djeshme pati disa deklarata të presidentit Refik Halili duke sqaruar atë që kishte ndodhur te Tirana. Ndërsa në mbrëmje, kreu i klubit bardheblu ishte ftuar për të folur në emisionin “Pressing” të Gert Çarçanit.
Por, presidenti zgjodhi të mos prononcohej më për të njëjtën çështje pasi i kishte thënë të gjitha. Kaq mjaftoi dhe moderatori i këtij emisioni sportiv, kritikoi ashpër punën e Halilit përmes kronikave të tij. Një taktikë e ndjekur edhe me drejtorin e përgjithshëm të Partizanit, Olsi Ramën, kur ky i fundit e refuzoi disa herë për të qenë në panelin e emisionit të tij.
Në fakt është e habitshme se pse kjo lloj lëkundje nga një prej gazetarëve më me përvojë në vendin tonë, pasi 3 javë rresht ftoi të gjithë drejtuesit e Tiranës, nga presidenti Halili, te administratorja Goldi e deri te drejtori sportiv Tefik Osmani. Të gjithë e dijnë që Nevil Dede ka qenë pjesë e panelit analitik të “Pressing” dhe këtë miqësi ndofta Çarçani po tenton ta promovojë edhe publikisht.
Vjet sulmoi publikisht trajneri kampion, atë që riktheu titullin pas 11 vitesh në vitin jubilar të klubit, Emanuel Egbonë. Arsyeja? Sepse ky i fundit nuk preferoi të ishte në emisionin e tij për të promovuar suksesin dhe arritjen si trajner i Tiranës.
Olsi Rama e provoi sezonin e shkuar dhe drejtorit të kuq s’i bëri “syri tërrc” për atë që fliste dhe thoshte Gert Çarçani. Ai vijoi punën, madje zgjidhte studio të tjera për të dhënë mendimet apo opinionet e tij. E dje, presidenti Refik Halili u prononcua fillimisht për të gjitha mediat e më tej foli në një lidhje telefonike për Gjergj Stefën, gazetarin e njohur sportiv me një përvojë të madhe në futbollin shqiptar.
Loading ...
