Bylis-Laçi një ndeshje që pas asaj finale të humbur nuk u quajt më një ndeshje futbolli. Çdo sfidë e tillë si në Laç po ashtu edhe në Ballsh luhej përtej futbollit. Ashtu ishte dhe ndeshja e javës së 24 e Kategorisë Superiore në edicionin 2013-2014. Një ndeshje që do të luhej pa praninë e tifozëve, për shkak se fusha ishte dënuar nga Komsioni i Disiplinës. Por në stadium nuk mund të mungonin tifozët përballë një rivali të urryer. Autobotet ishin gati për të mbështetur skuadrën dhe ndeshja nuk nis në orarin e duhur. Një ndeshje që ishte programuar në orën 14:00 nis 20 minuta me vonesë, për arsye se delegati i ndeshjes Besnik Çela nuk lejon fillimin e ndeshjes, për shkak se tifozët duhet të largoheshin nga muret rrethues të stadiumit.
BYLISI-LAÇI 0-0
BYLISI: Frashëri, Idrizaj, Llënga, Guga (Ikpe 57'), Kelmendi, Kastrati, Kurti, Doshlaku, Mile (Shillova 75'), Kuli, Bakiu (Bordon 55'). Trajner: Emanuel Egbo
LAÇI: Bakaj, Çarls, Danaj, Çela, Sefgjinaj, Veliaj, Kehinde (Zefi 35'), Teqja, Nimani, Vucaj, Bërkiç (Malo 81'). Trajner: Stavri Nica
Një ndeshje që nis me shumë tension që në fillimin e saj pasi Bylis-Laçi kurrësesi nuk mund të quhej thjesht një ndeshje futbolli. Së fundmi pas inateve të Kupës ishin shtuar dhe largimi i dy lojtarëve nigerian, Xhejms dhe Kehinde që largohen nga skuadra pa lejen e klubit për të firmosur me skuadrën laçiane. Gur, banane dhe vezë në drejtim të lojtarëve të Laçit dhe kryesisht dy lojtarëve nigerian. Kulmi arriti në minutën e 89-të kur gjyqtari i ndeshjes Olsi Sokoli akordon një penallti në favor të Laçit. Në këtë moment, takimi u ndërpre 7 minuta pasi lojtarët dhe stafi teknik i ballshiotëve qendronin jashtë fushës në shenjë irritimi ndaj vendimit të arbitrit Sokoli. Në fund vendoset që penalltia të gjuhet dhe Erjon Vucaj gabon, duke e dërguar topin jashtë portës që atë kohë mbrohej nga Stivi Frashëri.
Pas vërshëllimës së arbitrit situata degradon akoma më keq. Një prej zyrtareve të Bylisit hyn në fushën e lojës, duke goditur kë do që i dilte para. Objektivi ishin padyshim Xhejms dhe Kehinde, por nuk mund të shmangej asnjë lojtarë i Laçit, të cilët morën goditje të shumta. Një tjetër që pësoi një goditje të rëndë ishte dhe delegati i ndeshjes, Besnik Çela, i cili pas dy gjuajtjeve në kokë me sende të forta përfundon në tokë i gjakosur dhe dërgohet menjëherë në sptalin e Fierit për një mjekim më të specializuar. Një ndeshje futbolli që u kthye në një "arenë gladiatorësh", ku vetëm për futboll as që bëhej fjalë që të flitej. Më pas Komisioni i Disiplinës do të vendoste për herë të parë që një skuadër do të përjashtohej nga kampionati për shkak se kishte dështuar në organizimin e një ndeshje futbolli.
Një dënim i padëgjuar më parë, por që për FSHF-në duhej që një skuadër të bëhej "kokë turku" dhe Bylis ishte skuadra e parë që pësojë një dënim të tillë. Prishje gare, lojtarë të lënë në mes të rrugës, pasi merkato ishte mbyllur dhe asnjë prej tyre nuk kishte të drejt të firmoste për asnjë ekipë tjetër për pjesën tjetër të sezonit, kur duheshin edhe shumë ndeshje deri në përfundim të edicionit dhe një qytet që të vetmin gëzim kishte futbollin. Tashmë gjërat kanë ndryshuar. Të dyja skuadrat kanë bërë "paqe" mes tyre dhe çdo sfidë luhet vetëm në fushën e lojës.
Për ironi të fatit, pas 5 sezonesh, këto skuadra do të përballen përsëri së bashku, duke filluar që nga dita e mërkurë në Kupën e Shqipërisë. Takimi i parë do të jetë në Ballsh. Tanimë këto dy ekipe kanë treguar se e kanë rritur shumë cilësinë e futbollit dhe padyshim që pritet që në shkallët e stadiumit të jetë një numër i lartë tifozësh, për ta përkrahur skuadran e qytetit të tyre. Jo vetëm në Ballsh, por edhe në ndeshjen e kthimit në Laç të ndodh e njëjta gjë. Tifozët duhet të jenë aty për të shijuar një ndeshje futbolli, sepse pa ta, sporti më i populluar në botë nuk ka asnjë kuptim./ Nga ditari i një tifozi/.
Lexo gjithashtu
