Europa League sot foli shqip pasi 3 skuadrat shqiptare, Laçi, Teuta dhe Kukësi fituan dhe kaluan kështu në turin e dytë duke arritur një sukses të jashtëzakonshëm.
Fillimisht ishte Teuta që mundi me rezultatin e pastër 2-0 Beitar Jeruzalemin në "Niko Dovana".
Më pas ishte Laçi që bëri një ndeshje të jashtëzakonshme në Baku të Azerbajxhanit duke fituar me penallti 4-5 ndaj Keshlas. Në fund ishte radha e Kukësit në "Air Albania" që nuk gabon dhe mund Slavia Sofian me rezultatin 2-1.
Për herë të parë klubet shqiptare kalojnë në turin e dytë të Europa League dhe ky sukses është komentuar edhe nga presidenti i Federatës shqiptare, Armand Duka. Me anë të një postimi në rrjetet sociale, numri një I futbollit shqiptar thekson se Europa League sot foli shqip.
Postimi I Armand Dukës:
Sot, Europa League foli shqip! Në të gjithë kuptimin e plotë të fjalës. Një super mbrëmje për skuadrat shqiptare! Pas kualifikimit të Teutës më herët gjatë ditës, vjen edhe suksesi i KF Laçit në transfertën azere si edhe triumfi i Kukësit ndaj Slavia Sofjes. Është fantastike, më bukur se kaq nuk kishte ku të shkonte! Asgjë nuk vjen nga rastësia, ky është një sukses që vjen si shpërblim për punën e mirë dhe të palodhur që klubet shqiptare kanë bërë në vazhdimësi.
Krenar për kualifikimin e tre klubeve shqiptare në turin tjetër të Europa League, krenar për futbollin shqiptar! Urimet më të mira edhe për Laçin edhe për Kukësin. Suksese të mëtejshme në Europa League. Faleminderit për emocionet që na dhuruat!
Sot ishte një Shqipëri futbolli. Një Shqipëri që shkëlqen. Shqipëri që jep shpresë...
Lexo gjithashtu
