Kujt do t’ia merrte mendja që Sopoti të binte në një kategori më poshtë, kur jo më larg se viti i shkuar tentoi që të shkonte në Superiore. Megjithatë, ky tashmë është fakt që nuk mund t’i shmangemi. Skuadra librazhdase u mund nga Partizani B në ndeshjen “play-off”, ndërsa sezonin e ardhshëm do t’i duhet që të luajë në Kategorinë e Dytë, ashtu si dy vite më parë. Ndërkohë që të gjithë lojtarët janë larguar pasi u ka përfunduar kontrata dhe administratori Iridon Bahiti është shkarkuar nga posti i tij.
Tashmë askush nuk flet për këtë skuadër, e cila në ndeshjet vendimtare ka treguar shpirt gare, gjithashtu ka luajtur në fusha neutrale, për shkak se stadiumi i qytetit të Librazhdit nuk u bë asnjëherë, edhe pse është premtuar për vite me radhë. Sa i përket sezonit të ri, nuk dihet ende sesi do të veprohet.
