Ish trajneri i Skënderbeut dhe Dinamos, Bledi Shkëmbi ka dhënë një intervistë për “Sport Neës” në News 24. Ndër të tjera korçari është pyetur edhe për Xhuliano Skukën, i cili u largua pak ditë më parë tek skuadra e Metz në Francë.
Skuka ka qenë nën urdhrat e Shkëmbit kur ky i fundit drejtonte Dinamon vitin e shkuar. Sulmuesi nuk gjeti fare hapësira në formacionin e Shkëmbit dhe u detyrua të largohej tek rivalët e Partizanit. Tek “të kuqtë” dibrani luajti 17 takime në Superiore duke realizuar 10 gola dhe dhënë një asist, duke lënë pas krahëve periudhën e errët tek Dinamo.
Mirëpo Shkëmbi nuk duket se është “penduar” për mosaktivizimin e Skukës tek Dinamo. Madje ai ka dashur ta hedhë përgjegjesinë nga vetja.
“Nuk bëra ndonjë gabim të madh me Skukën, ishtë një moment jo për të te Dinamo. Nuk e besoja se do të shitej kaq shumë, se unë nuk shikoj individin, por grupin. Kam ende kontakte dhe bisedoj me Skukën. Pavarësisht se në Shqipëri kur ndodh diçka të gjithë heqin dorë, unë kam mbajtur përgjegjësitë deri ku isha unë gabim. Por Skuka nuk iku nga mua, janë të tjerë që duhet të përgjigjen”, ka përfunduar Shkëmbi.
