Publikimi i dënimeve për klubet në javën e parë të Superiores nga ana e Komisionit të Disiplinës pranë FSHF-së, ka përmbyllur tashmë edhe juridikisht siparin ngritës të Kampionatit Shqiptar për këtë vit. Ndonëse është herët për të dal në konkluzione përfundimtare në atë çfarë do prodhojë ky edicion i Superligës, disa përfundime mund ti nxjerrim që në javën e parë.
Dhuna
Kështu dhuna duket se do të jetë sërish protagoniste në tribuna, ndoshta dhe në fushë me kalimin e javëve, me ose pa policinë brenda stadiumeve. Tifozeritë ende nuk janë në nivelin e duhur, qoftë kjo për faj të tyre, të klubeve apo federatës qoftë. Megjithatë nuk mund tu vihet shumë faj atyre, ku natyrisht përgjegjësia më e madhe duhet të bie mbi organizatorët e garës, që janë pikërisht klubet dhe institucioni i FSHF-së.
Arbitrat
Nga ana tjetër arbitrat sërish do të jenë në qendër të diskutimeve me vendimet e tyre, edhe nëse gabimet do të jenë më pak në numër ose të paktën në dashakeqësi se vitet e tjera. Ndeshja Kukësi-Laçi na e tregoi këtë gjë, me verilindorët që arritën deri aty sa të kërkojnë të mos gjykohen më nga Enea Jorgji, gjyqtari që u dha praktikisht titullin kampion mes polemikave para dy vitesh kundër Skënderbeut në “Zeqir Ymeri”. Natyrisht ato ishin kohë të tjera.
Skënderbeu
Por ka dhe një aspekt sportiv ky kampionat. Skënderbeu vijon të jetë ekipi për t’u mundur. Petku i kampionit dhe i rekordeve Europiane është më i rëndë se UEFA apo CAS-i, me korçarët që duket se jan forcuar edhe më shumë moralisht nga situata e krijuar pas dënimit 10-vjeçar.
Derbi
Tirana dhe Partizani, dy ekipet e kryeqytetit (pa harruar Kamzën por që juridikisht është bashki më vete), e nisën me humbje këtë sezon. Bardheblutë e rikthyer duket se e nisën Superligën aty ku e lanë para dy vitesh. Shpresojmë që për të mirën e futbollit dhe historisë këto dy ekipe ti shohim sa më lart në vijim, e natyrisht derbi do të jetë pika kulmore e secilës prej 4 fazave të kampionatit.
Tifozët
Vetëm dy ndeshje me tifozë në javën e parë, Skënderbeu-Partizani dhe Tirana-Kamza. Stadiume të boshatisura në qytetet e tjera. Përveç Kukësit që justifikohet nga largësia, në Gjirokastër dhe Durrës pamja e impianteve ishte vërtet zhgënjyese. Klubet mesa duket edhe një herë dështuan të bindin njerëzit për të ardhur dhe për të parë nga afër ekipin e zemrës dhe të qytetit. Diçka nuk shkon në këtë mekanizëm pasi vapa nuk mund të jetë justifikim, përderisa 3 tifozeri “nuk pyetën” për motin këtë rradh. Ndoshta ajo që luhet në fushë, ose çfarë është bërë vitet e shkuara, le të themi…
Loading ...
