Sot, Partizani ka zhvilluar seancën e radhës stërvitore të planifikuar nga stafi teknik në kuadër të përgatitjeve për ndeshjen kundër Laçit, e vlefshme për javën e 28-të të Superiores.
Të pranishëm kanë qenë të gjithë futbollistët përveç Jurgen Bardhit, i cili nuk është parë pranë ekipit, por as në ambientet e qendrës stërvitore në Kamëz.
Mesfushori me tipare sulmuese pësoi një dëmtim në shpatull në ndeshjen kundër Kamzës, që mesa duket do ta mbajë jashtë për disa ditë. Gjithashtu veçmas është stërvitur edhe Gerhard Progni, që ka pësuar një të çarë në vetull.
Fillimisht 31-vjeçari ka kryer vrapime rreth fushës dhe më pas është larguar duke marrë miratimin e stafit teknik, për të mos dëmtuar vetullën e çarë. Gjithashtu edhe Blerim Kotobelli ka kryer disa vrapime të lehta rreth fushës dhe më pas është udhëzuar nga trajneri Dalipi që të qëndrojë pushim për shkak të ngarkesës së madhe që ka pasur javët e fundit. Me shumë mundësi mëngjërashi nuk do të jetë i gatshëm për takimin kundër kurbinasve.
Ndeshja kundër Laçit do të luhet të dielën dhe deri më tani mungesë e sigurt është Lorenc Trashi që ka plotësuar numrin 4 të kartonave të verdhë. Me gjasë edhe Jurgen Bardhi nuk do të jetë i gatshëm dhe tashmë trajneri Dalipi duhet të mendojë zëvendësuesin e tij. /Newsport.al/
Lexo gjithashtu
