Komisioni i Disiplinës dënoi ashpër Pogradecin me pezullimin e katër titullarëve të rëndësishëm për trajnerin Nikaj. Zefi, Çela, Hyzellari dhe Henriques janë futbollistët që do të mungojnë për ekipin liqenor por kjo ka sjellë edhe një të mirë. Katër vende bosh në formacion u kanë hapur rrugën talentëve të rinj që të tregojnë vlerat e tyre.
Bega e Blacëri kanë marrë më shumë minuta duke zhvilluar më shumë talentin e tyre. Një tjetër talent është edhe Pilinci i cili është stërvitur prej fillimit të sezonit me ekipin por pa patur minutat e tij dhe tashmë i vjen një mundësi e artë për të treguar vlerat e tij.
Ditën e dielë, plani i stafit teknik duket se do të jetë i njëjti duke qenë se përballë gjejnë ekipin e Memaliajt të vendit të fundit. Pogradeci ka pozita të konsoliduara në vendin e dytë dhe i lejon vetes “eksperimente” ndaj kjo ndeshje shihet si një test i mirë për lojtarët që nuk kanë marrë minuta.
