Viktor Xhufo (Victor Juffo) ishte pjesë e Flamurtarit për sezonin 2017-2018, por duke lënë shumë pak shenjë te vlonjatët.
I ardhur nga Shkëndija si dëshirë personale e trajnerit të atëhershëm të Flamurtarit Shpëtim Duro, 25-vjeçari shihej me shumë perspektivë te kuqezinjtë, por një dëmtim i pësuar dhe kriza që përfshiu vlonjatët në pjesën e dytë të sezonit të shkuar shkatërruan gjithçka.
Vetë Xhufo ka rrëfyer në një intervistë për Telesport, makthin e përjetuar prej tij dhe familjes në Vlorë gjatë aventurës së tij të shkurtër te Flamurtari. "Pësova një dëmtim që me trajtimin e duhur kalonte për dy javë. Por klubi nuk më ofroi mjekim dhe u detyrova të stërvitem i parekuperuar plotësisht. Kjo solli rënie të theksuar fizike dhe kështu dola jashtë planeve të skuadrës", deklaroi braziliani.
Gjithashtu ai shtoi se te Flamurtari nuk paguhej rregullisht, sidomos pas dy fazave të para të kampionatit. "Është vështirë të punosh kur nuk ke kushtet për të punuar, familjen për të mbajtur e faturat për të paguar. Bashkëshortja ime gati ra në depresion. Deklarova që klubi s'më kishte asnjë borxh ndryshe nuk ikja dot, edhe pse më detyroheshin një shumë të madhe. S'do qëndroja as për pagën më të mirë në botë", deklaroi lojtari që tashmë luan te Vardari në Maqedoni.
I pyetur për një rikthim të mundshëm në kampionatin shqiptar Xhufo është treguar i prerë që nuk e konsideron në asnjë moment, ndërsa theksoi se e ndjek fare pak Superligën.
Lexo gjithashtu
