Tirana dhe Partizani vijojnë të drejtohen nga trajnerë provizorë. Shkarkimi i Julian Ahmataj dhe Franco Lerdës kanë sjellë një situatë të pazakontë për klubet e kryeqytetit. Dy skuadrat e shohin veten pa trajner të parë, çka ka ndezur një mini derbi sa i takon preferencave për stolin.
Ilir Daja duket se është i preferuari i klubeve, me trajnerin aktual të Skënderbeut që e quan një vlerësim të madh interesin e tyre. Daja dhe presidenti i Tiranës takohen herë pas here si shkak i miqësisë, duke ndezur kështu edhe “thashethemet” për afrimin e tij në kryeqytet. Për momentin trajneri që drejton në Korçë e ka mendjen vetëm te Skënderbeu, duke i kërkuar drejtuesve përforcime për pjesën e mbetur të sezonit. Në javët që vijnë pritet të mësohet nëse Ilir Daja do t’i rezistojë tundimit për t’u rikthyer ose jo në kryeqytet.