Kryetarja e Bashkisë Shkodër, Voltana Ademi ka kërkuar një fond të ri prej 300 milionë lekësh për klubin e Vllaznisë.
Në rolin edhe të presidentes së skuadrës, Kryebashkiakja i ka kërkuar Këshillit Bashkiak që të miratojnë një fond të ri për shkak se shpenzimet në Europë janë të papërballueshme duke marrë parasysh edhe udhëtimet jashtë Shqipërisë apo qendimin në hotele.
Edhe pse kanë fituar më shumë se 500 mijë euro nga UEFA, duket se në Shkodër nuk mjaftojnë e për këtë arsye Voltana Ademi ka kërkuar një fond të ri për klubin.
“Për çështje si pagat e lojtarëve stafit, tatimet që vazhdojnë e paguhen në vijimësi, etj. Ka në vazhdimësi akumulim të detyrimeve që vazhdojnë gjatë kësaj periudhe e nuk mund të mbulohen. Jemi përpjekur me të ardhurat e siguruara nga klubi por nuk mbulojnë tërësisht nevojën për mbështetjen e duhur. Konkurrimi në Europë do të ketë të ardhura për arkat, por këto të ardhura nuk kanë hyrë në buxhetin e klubit ende dhe kësisoj vështirësitë vazhdojnë të jenë permanente.
Kemi vijuar punën për t’i përballuar me donatore e sponsorin, edhe me FSHF e cila ka vijuar mbështetjen tonë duke na krijuar mundësinë e mbështetjes sidomos për logjistikë e kërkohen financime. Na e kanë mundësuar pagesën në avancë.
Ndaj kërkojmë që nëse mund të vijojmë të sigurojmë si më parë financim për shërbime që klubi ka marrë, si paga e detyrime, qira banesash, detyrime për transport e akomodim e trajtim ushqimor. Nuk pretendojmë t’i likuidojmë të gjitha, pretendojmë të rritim të ardhurat këtë vit. Duke vlerësuar mundësinë e mbështetjes, kemi propozuar alokimin e fondeve për një vlerë rreth 30 milionë lekë të reja, për mbulimin e shpenzimeve prioritare të rreshtuara më sipër.
Nuk mjafton ajo që ka klubi sot, ndaj kërkojmë ta mbështetim. Tashmë me konkurrimin në Europë e privatizimin, si dhe me rritjen e konkurrueshmërisë, me vlerën që merr, shpresojmë që Vllaznia të vazhdojë rrugën e suksesit e të qëndrueshmërisë financiare”, tha Ademi.
Loading ...
