Partizani humb në Gjirokastër, ish drejtori i kuq: President merr masa sa nuk është vonë, investimi juaj meriton respekt

Dritan Dervishi ka folur pas ndeshjes së Partizanit me Luftëtarin, ku të kuqtë u mundën me rezultatin 2-0. Në një prononcim për newsport.al, ish drejtori i 15 herë kampionëve të Shqipërisë deklaroi:

“Pashë sot Partizanin. Një konfuzion total nga ana taktike. Presidenti Demi dhe tifozët nuk e meritojnë këtë rezultat. Këtë vit Demi ka harxhuar, ka plotësuar çdo kapriçio të stafit. Kujtuan se fitohet titulli në Turqi. Jam kurioz të dëgjoj nëpër transmetime sportive drejtuesit, çfarë do të na tregojnë  ne që kërkojmë Partizanin kampion, apo do të na tregojnë përralla dhe justifikime. Ose ndoshta na sulmojnë me justifikime duke lënë fajin jetim.

President merr masa sa nuk është vonë. Investimi juaj meriton respekt, jo këto ndeshje të turpshme. Kukësi është kockë e fortë dhe grup që nuk dorëzohet kurrë. Skënderbeu po kalon krizën, besoj se sirenat e alarmit u dëgjuan nga Luftëtari”, përfundoi Dritan Dervishi.