PAKULT habit para ndeshjes me KAMZËN: Këtë që kam parë në Shqipëri se kisha parë asnjëherë, Sukajt duhej t’i jepej penallti në Kukës

Trajneri i Kukësit, Peter Pakult ka mbajtur një konferencë për shtyp, para ndeshjes së kampionatit kundër Kamzës.  Gjatë konferencës, trajneri ka thënë se ndryshe nga vendet e Europës, në Shqipëri jepen shumë faulla, që vonojnë lojën. Trajneri tha gjithashtu se Sukajt duhej t’i jepejnjë penallti në Kukës, në ndeshjen e pak javëve më parë.

“Pas largimit të Bakajt kemi vetëm Gurin në repartin e sulmit. Dihej që në një moment nuk do të ishte i gatshëm për ekipin. Ndodhi për ndeshjen ndaj kamzës. Nga ana e tij, Balde ka pasur një problem të vogël në stërvitje. U lëndua dje dhe duhet të shoh gjendjen e tij e pastaj të vendos formacionin. Ebipi? Do të jetë pjesë e skuadrës për ndeshjen ndaj Kamzës, duke parë paraqitjen që bëri në Vlorë. Objektivi në këtë ndeshje? Nuk ka lojtarë, apo skuadra që kënaqen me një pikë. Me këtë dua të them se synojmë fitoren ndaj Kamzës.

Dua të sjell në vëmendje ndeshjen e Kamzës ndaj Partizanit, ku po të mos bëhej ai gabim, loja do të shkonte drejt barazimi. Kundërshtari ynë i nesërm ka ekip të mirë në mbrojtje dhe luan me kundërsulm. Do të mundohemi të kemi kundërvënien tonë, por do ta shihni gjatë lojës si do të luajmë. Objektivi? Do të shohim nga java në javë, nga ndeshja në ndeshje. Nuk jam në gjendje ta them tani se çfarë do të ndodhë deri në fund të kampionatit.

Rivali për vendin e dytë? Shohim punën tonë. Nuk na intereson ndeshja e nesërme mes Laçit dhe Partizanit. Ndeshja e Kupës ndaj Laçit? Ishte një gol i rregullt, ai i Idrizit, që u anulua. Idrizi nuk bëri faull. Do të ishte shumë më mirë të fitonim, por theksoj se ka kohë për të menduar për Kupën. Kemi ndeshjen me Kamzën dhe Partizanin përpara kthimit me Laçin.

Nga kjo situatë, Partizani është ekipi i vetëm që mund të përfitojë, pasi nuk luan në Kupë dhe ka impenjim vetëm kampionatin.

Kampionati shqiptar? Në krahasim me futbollin europian, këtu ndërpritet loja shumë. Jepen shumë goditje dënimi këtu, në Europë nuk jepen fare. Kur ndërpritet loja, nuk ka ritëm. Sa kohë jam trajner i Kukësit, nuk më ka ndodhur të shoh ndeshje pa u ndërprerë çdo 3-4 minuta. Futbollistët që duan në luajnë me ekipe jashtë Shqipërisë nuk duhet të sillen kështu. Arbitrimi? Ka problemet e veta. Nuk mendoj se ata gabojnë me qëllim, por duhet të evitohet. Edhe në Serbi nuk ka shumë ndryshime me futbollin shqiptar sa i takon gjykimit.

Për dallimet e mëdha në gjykim do të përmendja dy raste: goli ynë i rregullt, që u anulua në Laç, nuk do të anulohej në Europë, dhe ndërhyrja e Allës ndaj Sukajt në Kukës do të jepej penallti në Europë. Me këto nuk dua të them se ka nivel të ulët futbolli shqiptar, por se me nivelin që ka kampionati, disa ekipe mund të luajnë në arenën ndërkombëtare pa problem. Ka mungesa në aspektin taktik të lojtarëve, por me kalimin e viteve do të rritet më shumë niveli dhe nuk është problem kjo pjesë”.