A do ndryshojë emër “Loro Boriçi” pas ndeshjes me Maqedoninë?

“Loro Boriçi” është impianti i radhës modern që i shtohet futbollit shqiptar.

Por, tashmë pas ndeshjeve kundër Marokut dhe asaj ndaj Maqedonisë ngrihet pyetja nëse stadiumit i Shkodrës do të ndryshojë ose jo emër, ashtu siç ndodhi me “Ruzhdi Bizhutën” që mori emrin “Elbasan Arena”, apo edhe me stadiumin “Qemal Stafa” që do të emërtohet si “Arena Kuqezi”.

Sipas asaj që raporton “Shekulli”, nuk bëhet ende e ditur arsyeja e ndryshimit të emrit të stadiumit “Loro Boriçi”, por me shumë gjasa një gjë e tillë pritet të ndodhë pas ndeshjes së 5 shtatorit kundër Maqedonisë.

Një element që të bën të besosh në këtë aludim është fakti se lajmërimet që janë shpërndarë në Shkodër për ndeshjen ndaj Marokut janë shtypur pa emrin e “Loro Boriçit”.