Ndriçim Shtubina tregon besnikërinë ndaj Vllaznisë, zbulon nevojën imediate që ka ekipi

Në një prononcim për “Supersport”, pas miqësores së djeshme ndaj Besëlidhjes, ku Vllaznia humbi me rezultatin 0-1, ka folur mesfushori i Vllaznisë, Ndriçim Shtubina, i cili nuk ka asnjë merak për miqësoren apo merkaton e zhvilluar deri tani. Problemi sipas tij ka të bëjë me pjesën e parë të sezonit të kampionatit, ku kanë humbur shumë raste, të cilat kanë penalizuar ekipin. Ndërkohë që nuk lë pa bërë dhe një krahasim me Tiranën, për të cilën ai thotë se është mjaft e lehtë të arrihet.

“Ne kemi pasur mundësi për të qenë shumë më lart, duke konkuruar edhe Tiranën, por kemi gabuar në momentet tona më të mira, gjithsesi kështu është futbolli, forca jonë është për më shumë, por duhet t’i pranojmë gjërat kështu siç janë”.

Sikurse kapiteni nuk e ka lënë ekipin në kohë të vështirë dhe tani ai premton besnikëri ndaj skuadrës, me të cilën ai mendon se do të arrijë më të mirën.

“Unë gjithnjë mundohem të jap maksimumin tim si person, ngaqë jam edhe më afër me trajnerin dhe gjërat që mi kërkon trajneri unë mundohem ti bëj maksimalisht”.

Lidhur me afrimet, Shtubina ka thënë se ende ekipi ka nevojë për përforcime, duke vlerësuar prurjet e reja.

“Vllaznia ka nevojë edhe për 11 lojtarë në qoftë se janë të mirë, çdo gjë është e mirëpritur në Shkodër”.