Futbollisti i kombëtares shqiptare ka folur në një intervistë për gazetën “Bota Sot” pas transferimit të tij te Bari. Ai ka treguar synimet e tij me skuadrën e re dhe për të ardhmen e tij te kombëtarja shqiptare, në një kohë kur shumë futbollistë po konsiderojnë të kalojnë te Kosova.
Migjen, a ishte vendim i vështirë për t’iu bashkuar Barit?
Jo, aspak i vështirë sepse nga ofertat që kam marrë në Serie B Bari ishte klubi që më pëlqente më së shumti, është klub me tifozëri të madhe.
Çfarë prisni me Barin në Serie B?
Synimi është të hyjmë në Serie A, kemi një ekip me shumë eksperiencë dhe shumë lojtarë që kanë përvojë në Serie A po nuk do të jetë lehtë.
Sa keni mundur të adaptoheni me atmosferën dhe ambientin në FC Bari?
Me asnjë klub në Itali nuk më ka ndodhë mos mu ambientuar, me të vetmin që e kam pas problem ka qenë Luzerni.
Serie B nuk është e panjohur për Ju, cilat skuadra i sheh kandidate për kreun e tabelës?
Kam shumë ndeshje në Serie B dhe kam pasur fatin të luajë më herët në Serie B, si me Atalantan dhe Torinon, ka shumë skuadra të rëndësishme, mund të them që janë Frosinone, Bari, Carpi e Verona.
Jeni pjesë e kombëtares së Shqipërisë, morët pjesë në Euro 2016, a është viti i paharruar?
Sigurisht që kurrë nuk do të harrohet kjo eksperiencë e mrekullueshme, është nder i madh të jem pjesë e kësaj gjenerate, që u kualifikua për evropianin e parë për Shqipërinë.
Kosova është në prag të kualifikimeve, e sheh një kombëtare të denjë?
Kosova ka shumë lojtarë të mirë nëpër Evropë, besoj që do të përmirësohet edhe më shumë në të ardhmen, kjo është fillimi dhe besoj që nuk do të jetë lehtë për Kosovën, por këto ndeshje sigurisht që Kosova do të ketë shumë entuziazëm dhe në ato momente mundet me ndodhë çdo gjë.
Kosova iu kërkon, a po do të mbeteni në kombëtaren e Shqipërisë?
Kosova nuk më ka kërkuar, unë do të jem pjesë e Shqipërisë deri në momentin kur më largojnë ose kur e shoh që nuk i nevojitem më kombëtares.
A mendoni se ky do të jetë edicioni i juaj?
Nuk di, e shohim në fund të sezonit.
Lexo gjithashtu
