Menaxheri i Roshit zbulon detajet e transferimit në Rusi

Odise Roshi është futbollisti më i ri i ekipit rus Terek Gronzi. Shqiptari është larguar nga Rijeka për t’u transferuar në Rusi, ku do të bashkohet me shokun e tij të ngushtë, Bekim Balaj, i cili braktisi Rijekën për Terek Gronzi pak para fillimit të EURO 2016. Menaxheri i dy futbollistëve shqiptarë, Shkumbin Qormemeti, në një prononcim për Sport Neës zbuloi detajet e transferimit të Roshit.

“Çdo transfertë ka peshën e saj, sidomos kur bëhet fjalë për një futbollist të kombëtares. Për Odise Roshin ky është një hap i madh kur dihet që Premier League e Rusisë është në një nivel shumë më të lartë nga kampionati kroat. Mund të them që kjo transfertë u mbyll bashkarisht me Adrian Aliajn, kohëzgjatja e kontratës është 3-vjeçare. Nuk mund të flas për termat financiarë për të cilat mund të shprehet Roshi, por mund të them që i plotësova dëshirën dhe e bashkova me shokun e tij të ngushtë Bekim Balajn”, tha Qormemeti.

Ai shprehu bindjen e tij se dyshja shqiptare do të jetë një ndihmë e madhe për klubin rus.

“Dyshja Roshi-Balaj mund të jetë një ndihmë e madhe për trajnerin dhe klubin e Terek Grozny pasi të dy dihet që kanë eksperiencë dhe ishin në Kampionatin Europian, dhe besoj se që të dy do ta ndihmojnë Terek të ngjitet lart dhe të arrijë në Kupat e Europës që është dhe objektivi i klubit”, përfundoi menaxheri i cili ka tranferuar në Rusi edhe kosovarin Bernard Berisha.