Këtë fundjavë, Luftëtari arriti një fitore shumë bindëse në transfertën e Laçit, 0-2. Një javë më parë, gjirokastritët u mundën në shtëpi nga Kastrioti 1-5 dhe ky rezultat shkaktoi një rrëmujë të madhe, pasi solli edhe shkarkimin e trajnerit Gentian Mezani.
Në vend të tij erdhi tekniku Julian Ahmataj, njeriu që sezonin e kaluar e mbajti Kamzën në Superiore. Të fitosh në Laç nuk është aspak e lehtë, jo për skuadra të nivelit si Luftëtari, por edhe Skënderbeu në kohën e tij të "artë", apo edhe Partizani, e kanë shumë të vështirë që në atë stadium të marrin pikë, e jo më të fitojnë lehtësisht.
Fusha në tregon se ndonjëherë nuk ka shumë rëndësi vendi se ku luan, apo kundërshtari që ke përballë, por mjafton dëshira e madhe dhe përgatitja e mirë për të bërë surprizën. Në vetëm pak ditë, Ahmataj kishte punuar në atë lloj forme me djemtë e tij, që dukej sikur kishin kaluar shumë kohë.
Prova e parë, që ishte shumë e vështirë, u kalua me sukses. Ndeshje e administruar me qetësi dhe 3 pikë të marra me shumë siguri. Tashmë, Luftëtari ndodhet në vendin e 8 me 20 pikë, 4 më shumë se Kastrioti dhe 5 më shumë se Kamza. Në Superiore nuk ka përballje të lehta. Në javën e ardhshme, bluzinjtë presin në shtëpi Flamurtarin, ndeshje e vlefshme për javën e 21 të kampionatit. Mbetet për t'u parë si do të shkojë ky takim.
Lexo gjithashtu
