Ibrahim Bejte u dëmtua dje në ndeshjen që Sopoti luajti kundër Bylisit në kuadër të javës së 17 të të Kategorisë së Parë. Portieri i librazhdiotëve pësoi një dëmtim të rëndë gjatë një dyluftimi në ajër dhe më pas u dërgua me urgjenc në spital. Ai iu nënshtrua një operacioni që zgjati dy orë pasi kishte pësuar frakturë të rëndë në krah.
Për këtë newsport.al ka kontaktuar lojtarin, për të mësuar më shumë për këtë ngjarje të rëndë. I sapo dalë nga spitali Bejte tregoi ngjarjen teksa deklaroi:
"E gjitha kjo ndodhi në një dyluftim në zonë dhe nuk mund të them se lojtari i Bylisit e bëri me qëllim. Këto janë gjëra që ndodhin në fushën e lojës dhe mund t'i ndodhë kujtdo. Mund të them se është si me rastin me ndeshjen e Pogradecit ku në momentin e përplasjes, Pengu ka thyer këmbën.
Isha i vetdijshëm gjatë gjithë kohës që në momentin që mu thye krahu dhe pas kësaj i jam nënshtruar një ndërhyrjeje. Operacioni ka kaluar me sukses dhe për këtë do të doja të falenderoja deputetin Taulant Balla dhe Andi Matraxhiut për mbështetjen financiare të ndërhyrjes.
Tashmë po pres të rikuperohem dhe do të mundohem të gjej forcë për të vazhduar më tej. Besoj se rikthimi do të jetë mjaft i vështirë, por me shumë punë dhe përkushtim do të arrij të futem së shpejti në fushën e lojës.
Një falenderim kisha edhe për newsport.al dhe interesin e treguar ndaj meje", ka përfunduar portieri librazhdiot./NEWSPORT.AL
Lexo gjithashtu
