LAÇI “shpëton” CUNGUN, humbja e PARTIZANIT si ULTIMATUM për KUKËSIN dhe trajnerin

Humbja e Partizanit në fushën e Laçit erdhi si “aspirinë” për të “ulur temperaturën” e lartë të Kukësit. Pasi dështuan për herë të dytë radhazi të merrnin pikë në dy javë, lajmet e ditës së djeshme bënë me dije se klubi verilindor kishte shkarkuar teknikun e tij Armando Cungu, duke mos i falur një tjetër hap fals në luftën për titull kampion.

Por në mesditën e sotme, për nënkampionët e Shqipërisë, që nuk dëshirojnë më ta mbajnë këtë “nofkë”, erdhi lajmi shpëtimtar i dështimit të Partizanit në fushën e Laçit 0-1. Klubi kuksian i falet mrekullisht ekipit të Besnik Prengës, i cili pati guximin të gjunjëzonte të kuqtë duke u shkaktur humbjen e katërt në këtë sezon, megjithë polemikat e arbitrimit të kryesorit Klajdi Kola.

Ai që shpëton momentalisht është tekniku shkodran, pasi Laçi e ndihmon të mbajë ende “vendin e punës” te Kukësi. Por ky nuk është mesazhi përfundimtar vetëm për teknikun e Kukësit, pasi tani janë lojtarët ata duhet të marrin përgjegjësitë për të zgjidhur shpërdorimin e rasteve flagrante për gol , neglizhencë që u kushtoi plot 6 pikë në sfidat me Tiranën (0-1) dhe Teutën (1-2).

Rregullat e futbollit janë të pamëshirshëm: kur një skuadër dështon në fushë, përgjegjësia dhe gishti i fajit drejtohen tek trajneri. Por më e rëndësihme nuk është “koka” e Cungut, por fati i sezonit dhe qetësia brenda kampit verilindor, të cilët janë përfshirë shumë thellë në luftën e paepur për kurorën e kampionatit, por kanë treguar paqëndrueshmëri psikologjike nga java në javë. Një shkarkim i Cungut në mes të sezonit do të ishte një goditje shumë herë më e rëndë sesa ecuria regresive e skuadrës, pasi nëse një ekip ndërron trajner në mes të sezonit, bëhet akoma më e vështirë ruajtja e ekuilibrit teknik dhe psikologjik të ekipit.

Megjithatë, humbja e Partizanit vlen më shumë si ultimatum për skuadrën e Kukësit, e cila duhet të mësohet të mos presë “dhurata” nga ekipet e tjera të kampionatit, por të marrë vetë në dorë fatin e vet. Me Cungun, ekipi arriti të shkurtonte distancën nga 12 pikë në 4 pikë në fund të gjysmës së parë të sezonit dhe kjo nuk do të thotë se ekipi i Kukësit i ka humbur përfundimisht shpresat për titullin. Kohën ata duhet ta shfrytëzojnë në favor të tyre./NEWSPORT/.