Një “produkt” i Akademisë së Skënderbeut, Anteo Osmanllari, është një tjetër talent që po militon në Kategorinë e Parë dhe po bën mjaft mirë tek skuadra e Pogradecit. Një “thesar” për trajnerin e tij dhe kokëulur në punën që bën, Osmanllari ka fituar një vend titullar tek Liqenorët. Ai është lojtar i Skënderbeut por i huazuar tek fqinjët e Pogradecit.
Ky lojtar është një shembull i përulësisë dhe i njeriut që flet me vepra se sa me fjalë. Fusha është vendi ku ai shprehet dhe nuk pëlqen të ekspozohet shumë.
Në një intervistë për newsport. al, Anteo Osmanllari ka rrëfyer idhullin e tij, objektivat e Pogradecit, madje dhe ofertat që ka pasur, nga Superliga.
– Osmanllari ju momentalisht po luani tek Pogradeci, cilat janë objektivat e ekipit këtë sezon?
Kur hyhet në një garë, të gjithë duan të fitojnë, pse jo dhe të shpallemi kampion, në Grupin B. Momentalisht jemi në vend të katërt dhe nuk është se po bëjmë keq deri tani.
– Ju jeni një nga lojtarët më në formë dhe të pazëvendësueshëm të ekipit, keni pasur oferta nga ekipe të tjera të Superligës, apo Kategoria e Parë?
Po kam pasur oferta nga Superliga, por momentalisht jam i përqëndruar tek Pogradeci. Nëpërmjet punës time këtu, vijnë dhe ofertat dhe çdo e mirë tjetër.
– Do të preferonit që të luanit titullar këtu, apo të ishit rezervë në ekipe të elitës ?
Për mua e rëndësishme është të luajë, nuk ka rëndësi ekipi, nuk ka rëndësi pozicioni. Unë jam i gatshëm ta nisë dhe nga stoli. Jam nën urdhërat e trajnerit dhe do të bëjë maksimumin kudo.
– Cila mendoni se është pika juaj më e fortë dhe më e dobët në fushën e lojës?
Çdo lojtar ka avantazhet dhe disavantazhet e veta, por unë nuk preferoj të flas shumë për veten. Unë punoj dhe mundohem të përmirësohem. Punën time dhe ato që jap në fushë, i vlerëson trajneri apo dhe vet rezultatet.
– Besoj se çdo futbollist ka një idhull apo një ekip që frymëzohet, po ju tek kush e gjeni frymëzimin?
Do jap një përgjigje pak klishe, Cristiano Ronaldo është ai që frymëzohem. Ai na motivon ne lojtarët që të përmirësohemi dhe të kuptojmë që me punë, në futboll arrihet çdo gjë. Puna dhe vullneti të çojnë përpara.
– Si një lojtar i Kategorisë së Parë, besoj se Superligën e ndiqni? Cili është ekipi që i’u bind më shumë këtë vit?
Patjetër që e ndjek. Nuk mund të them që më bind ndonjë ekipi specifikisht. Të gjitha ekipet kanë çfarë japin në këtë kampionat. Madje dhe ato të vendeve të fundit, kanë grindën. Respekt për të gjitha skuadrat edhe trajnerët e tyre./ Marsel Alliaj/
Loading ...
