Partizani barazoi sot 1-1 kundër Laçit, rezultat që i shkon për shtat të dy ekipeve duke përfituar nga ndalesa e Vllaznisë kryesuese në Shkodër. Pas këssaj sfide ka folur trajneri Ilir Daja i cili ishte i kënaqur me atë që skuadra e tij prodhoi në fushën e blertë.
Duke pasur parasysh mungesat e shumta, për teknikun e kuq ky takim ishte i mirë për kryeqytetasit. Në prononcimin e zakonshëm pas ndeshjes, Ilir Daja deklaroi:
“Unë do të thoja që ishte një ndeshje me shumë ritëm, ku dy ekipet kërkuan fitoren. Kishte pak ekuilibra në lojë. E kemi nisur jo mirë ndeshjen. Laçi na kapi dy herë në kundërsulm, që nuk i lejohet një skuadre profesioniste. Dëshira sot ishte maksimale. Doza emocionale ishte në nivelin e duhur, ajo që cedoi ishte ekuilibri taktik. Prandaj të dy skuadrat kishin raste para porte.
Ndryshimet? Nuk thashë që kishim luhatje, thashë që të dy ekipet kishin dëshirë për ta fituar ndeshjen. Ishin dy skuadra të hapura në fushë. Sa herë që topi nisej për në sulm, hapësirat që kishin për të ekzekutuar ishin të mëdha, që do të thotë se ekuilibrat në fushë linin për të dëshiruar. Ne kemi punuar ndryshe gjatë javës, por kemi ndryshuar prej Brojës që u dëmtua në dy ditët e fundit.
Vllaznia? Unë e kam thënë që duhet të përqëndrohemi te ndeshjet tona. Skuadra ka entuziazëm. Shikojmë që lojtarët vrapojnë jashtë mase. Nëse s’duan t’ia lëmë spontalitetit, duhet të kenë ato që thashë më lart.
Problemi me golin? E rëndësishme është që të dalësh para porte, duhet të ndërtosh. Këtë gjë s’po e kuptonim në 15 minutat e para. Gjithësesi kjo edhe për meritë të kundërshtarit. Nëse do të kemi kaq shumë raste, sigurisht që do të shkojmë në më shumë finalizime. Kjo gjë rregullohet edhe më pas.
Asani? Do të thoja sapo ka mbaruar ndeshja dhe ndoshta në një moment të tillë trajneri s’duhet të flasë për lojtarët e tij. Meqë më pyetët, sot Asani nuk ishte pjesë e grupit sepse është një nga lojtarët më të talentuar të kampionatit shqiptar. Duhet të mësojë një gjë, që është më i rëndësishëm Partizani se Ilir Daja apo Asani, apo dikush tjetër. Secili lojtar ka një pozicion për rolin që ka. Ndonjëherë duhet të peshosh që loja është 90 minuta, jo 45 minuta. Ne bëmë mirë se e mbaruam lojën në avantazh në 45 minuta. Çdo futbollist duhet të japë maksimumin kurdo që futet. Kjo nuk duhet të ndodhë me asnjë futbollist, jo më me Asanin.
Mungesat? Unë përgjigjem vetëm për Partizanin. Do të thoja që ne kishim mungesa shumë të rëndësishme. Një skuadër kur funksionon mirë, këto mungesa vijnë që në fillim të javës, por kur Broja vritet në stërvitje, atëherë të ndryshon komplet strategjia. Besoj që ne na prishën punë jo vetëm për ta startuar ndeshjen në një formë tjetër, por edhe për të qenë me ndërrimet pak më ndryshe.
1 pikë? Jo, nuk jemi të kënaqur me 1 pikë pavarësisht se duhet respektuar kundërshtari. Sidomos në një ndeshje të tillë siç ishte kjo me Laçin.
Ekuilibrat? Kur ekipi nuk ka ekuilibër, shpenzimi i energjive është i madh. Mesfushorët duhet të bëjnë punë dyfish. Ndoshta kjo u ndje në pjesën e dytë. Nuk ishim në nivelin e pjesës së parë. Por, ishim prezent në lojë, të barabartë me kundërshtarin. Mund të kishim shkuar edhe te fitorja. Në fund fare për atë që prodhuan të dy skuadrat, barazimi ishte rezultat i drejtë. Luhatje do të ketë gjithmonë sepse janë dy ekipe që luftojnë për kryesimin e Superiores. Dëshira e madhe për ta fituar ndeshjen, i prish ekuilibrat. Nëse dëshira kalon mbi logjikën, prish gjithçka në fushë”, përfundoi ai.
Loading ...
