Myrto Uzuni është transferuar te Lokomotiva e Zagrebit në orët e fundit të merkatos, ndërsa Laçi nuk nguron të bëjë një falenderim të veçantë për lojtarin, i cili ka qenë shumë vendimtar për bardhezinjtë. Mjafton të kujtojmë ndeshjen e fundit në kmapionat para pak ditëve, ku me golin e shënuar në Korçë ndaj Skënderbeut, kurbinasit arritën të dalin me një pikë nga ai duel.
Në një postim në rrjetet sociale, Laçi e ngre në “qiell” sulmuesin beratas, i cili për herë të parë në histori i kualifikoi një raund në kupat e Europës.
“Festuam shumë gola të tij, e pamë të vraponte kilometra të tëra në fushë, dha gjithçka për klubin tonë dhe sigurisht që meriton falënderime nga të gjithë. Sot është pjesë e Lokomotivës së Zagrebit dhe emrin e tij e ka shënuar në historinë e klubit, duke qenë lojtari që na dha fitoren e parë në një ndeshje ndërkombëtare kundër Anorthosis Famagusta, por është edhe i pari që transferohet nga klubi ynë në një klub të huaj. Nuk na mbetet gjë tjetër veçse ta urojmë Myrton: Suksese në këtë hap tëndin në karrierë. Në Laç do të mbetesh në memorien e të gjithëve, ashtu sikurse edhe vetë nuk do ta harrosh këtë eksperiencë.
Urime”!
Loading ...
