Tirana B arriti një fitore me shifrat 7-2 kundër Partizanit B në sfidën e luajtur sot për javën e 16-të të Kategorisë së Dytë.
Takimi i zhvilluar sot në Pezë-Helmës foli për bardheblutë që shfrytëzuan në maksimum shanset për shënim, duke bërë të vetin, derbin “e vogël” të kryeqytetit.
Në një prononcim për newsport.al, trajneri i Tiranës B, Migen Memelli shprehet se nuk e priste një fitore me shifra kaq të thella, ndonëse pranon se kishte kërkuar nga futbollistët e tij të jepnin maksimumin në fushën e lojës për të fituar derbin ndaj Partizanit B. Sipas ish-sulmuesit të Tiranës, por edhe Partizanit në të shkuarën, fitorja e sotme te Tiranës B ishte e merituar dhe Memelli shpreson që ky sukses të ketë kënaqur sadopak tifozët bardheblu.
“Të them të drejtën, nuk e prisja një rezultat të tillë, por ne e kishim përgatitur ekipin në aspektin psiko-fizik, pasi kishim një javë të ngjeshur duke luajtur të dielën dhe sot dhe futbollistët kanë përballuar me sukses këtë ngarkesë. Ishte një fitore e merituar nga ana jonë dhe shpresojmë që të kemi kënaqur sadopak tifozët bardheblu, të cilët janë ‘oksigjeni’ i klubit tonë.
“Në 20 minutat e para të ndeshjes nuk ishim aty ku duhej, sepse ishte momenti i parë që po mundoheshim të studionim edhe lëvizjet e kundërshtarit. Nuk është se para sfidave që luajmë kemi ndonjë material filmik ku mund të shohim ndeshjet e kundërshtarit për t’i analizuar ata dhe për këtë arsye duhet ta bëjmë një gjë të tillë që në minutat e para të ndeshjes.
Arritëm të lexonim mirë lojën e Partizanit B dhe u munduam të kapnim pikat e tyre të dobëta. Kuptuam se duhet të luanim me top pas shpine dhe pikërisht kjo taktikë ishte rezultative.
Shënuam golin e parë përmes një goditje standarde, për meritën tonë normalisht. Goli i dytë na dha besim, i treti vulosi sfidën. Doja të shkonim në pushim të ndeshjes pa pësuar asnjë gol.
Në dhomat e zhveshjes iu kërkova futbollistëve ta mendonin ndeshjen sikur ishte 0-0 për të mos u vetëkënaqur, sepse unë dua ta fitoj gjithnjë një sfidë, jo vetëm derbin, por çdo ndeshje qoftë ajo. Në pjesën e dytë arritëm të shënonim sërish, sepse siç e thashë, ua bëra të qartë lojtarëve që të fitonin edhe pjesën e dytë dhe e arritëm, pra 3-0 pjesa e parë dhe 4-2 e dyta, në total 7-2. U ndëshkuam me dy gola, që më shumë se për meritë të Partizanit B erdhën për fatin e tyre. Në golin e parë që erdhi përmes një goditje standarde të kundërshtarit, topi shkoi në rrjetë pas disa devijimeve, ndërsa goli i dytë që shënoi Partizani erdhi më shumë si pasojë e mungesës së përqendrimit nga ana jonë, pasi edhe rezultati ishte 7-1 për ne.
Kjo ishte pika kulmore e skuadrës në këtë sezon, sepse me këtë fitore të thellë mund të them se ekipi është kolauduar totalisht.
Sigurisht që merita kryesore është e futbollistëve për këtë fitore, por kur ata bëjnë atë çfarë ne si staf i kërkojmë të bëjnë në fushën e lojës, kënaqemi, sepse bie në sy edhe puna që ne si trajnerë bëjmë në ekip.
Për sa i përket objektivave të sezonit, dua ta pranoj se ndoshta ne nuk i arrijmë dot synimet që kemi si skuadër dhe ne si staf teknik, pasi Egnatia tashmë në grupin tonë është shkëputur shumë në vendin e parë.
Por di të them se ne si Tirana B jemi dhe mbetemi në funksion të Tiranës së madhe dhe mundohemi të përgatitim futbollistë pikërisht për ekipin e parë. Ne si skuadër jemi gjithnjë në varësi të ekipit të parë dhe si të tillë mund të cilësohemi si ura lidhëse mes ekipeve të akademisë dhe skuadër së parë të Tiranës. Pra, u japim mundësi të luajnë futbollistët që vijnë nga akademia dhe atyre elementëve që për momentin nuk gjejnë shumë hapësira në ekipin e parë.
Sezonin e shkuar, kur morëm ekipin në drejtim, pas 16 ndeshjeve kishim 4 pikë, ndërsa tani pas 15 ndeshjeve kemi grumbulluar 25 pikë. Kjo gjë mua më ngroh, sepse vërtet kemi arritur të jemi ‘trampolinë’ duke përgatitur elementë me vlera për ekipin e parë si në rastin më të freskët, Klinsman Cake, mbrojtësi 17-vjeçar që ka luajtur me ekipet e akademisë, me Tiranën B dhe të dielën u aktivizua me Tiranën e madhe në kampionat kundër Flamurtarit si titullar. Ne si staf teknik do të japim maksimumin për të vijuar me këto ritme për të qenë në shërbim të Tiranës së madhe”, përfundon prononcimin e tij për newsport.al, trajneri i Tiranës B, Migen Memelli.
Loading ...
