Gugash Magani pritet të jetë trajneri i ri i skuadrës së Lushnjës. Ashtu siç është lajmëruar edhe në media, tekniku peqinas ka arritur marrëveshjen me lagunarët për sezonin e ri futbollistik. Në edicionin e ardhshëm, myzeqarët do të militojnë në Kategorinë e Parë. Dhe për këtë drejtuesit kanë menduar t’ia besojnë ekipin Gugash Maganit.
Eksperienca e madhe në kampionatin shqiptar e bëjnë atë të duhurin për të drejtuar një skuadër me tifozëri aq të madhe sa Lushnja. Burime të besueshme pranë klubit lushnjar bëjnë me dije për Newsport.al që dakordësia është arritur në parim.
Pritet që në ditët e ardhshme të zyrtarizohet në krye të pankinës lagunare për të vijuar punën në ndërtimin e skuadrës për sezonin e ri. Do të shihet me interes nëse Lushnja do të ketë në edicionin e ardhshëm një skuadër pretendente për t’u rikthyer në Superiore apo thjeshtë për të qëndruar në të Parën.
