Vazhdon të jetë i madh shqetësimi i tifozëve shqiptarë që kanë blerë biletat për ndeshjen Shqipëri-Izrael.
Një mesazh nga disa tifozë nga Saranda ka ardhur pak minuta më parë pranë redaksisë newsport.al, duke shprehur ankthin për mënyrën se si do të veprohet me 8 biletat e tyre që kanë blerë në Tiranë, ndërsa ajo çka kërkojnë të saktësohet dita kur do të shkëmbehen biletat në Elbasan.
Sipas burimeve të newsport.al, FSHF ka vendosur se biletat që janë blerë nga tifozët për ndeshjen Shqipëri-Izrael e programuar më parë në "Loro Boricci" do të ndërrohen në "Elbasan Arena" ku tifozët pasi të dorëzojnë biletën e vjetër do të vihen në posedim të biletës së re.
Por, tashmë pritet vendimi zyrtari i FSHF-së ku duhet të saktësohet dita në të cilën do të bëhet shkëmbimi i biletave në Elbasan, pasi dihet se në ditën e ndeshjes ndaj Izraelit, fluksi i tifozëve që do të kryejnë një procedurë të tillë do të jetë i madh.
