Interi do të luajë ditën e nesërme sfidën e radhës në kampionat ndaj Juventusit. Zikaltërit presin në orën 20:45 në “San Siro”, bardhezinjtë. Interi është kryesues i Serie A deri më tani në 6 javët e para të kampionatit dhe ditën e sotme në konferencën për shtyp ka folur edhe trajneri Conte. Tekniku italian u ndal ndër të tjera edhe te peticioni i tifozëve për heqjen e yllit me emrin e tij nga stadiumi i Juventusit duke sulmuar ashpër edhe presidentin Agnelli.
“Më vjen keq që Agnelli ndërhyri në këtë drejtim. Ai i dha rëndësi një propozimi vulgar, vulgar dhe pa vlera. Hapësirë për injorancë. Nuk duhet ta prek këtë temë, thashë që është faji juaj që lini hapësirë për situata që nuk japin ndonjë mësim. Aktivizoni urrejtjen dhe dhunën. Unë me të vërtetë nuk falënderoj askënd. Le të jemi të qartë, ata (që duan të heqin yllin) nuk janë tifozë. Ata janë injorantë dhe kjo është gjithçka, le të mos ngatërrojmë “.