Katar 2022
Armando Cungu ka folur pas kthimit nga faza përgatitore në Ulqin. Trajneri shkodran është shprehur i pakënaqur me merkaton e zhvilluar nga drejtuesit, megjithatë ai ka besim të lojtarët e tij. Cungu flet për fazën përgatitore, e cila nuk ka shkuar ashtu siç duhej.
“Përsa i përket mënyrës se si shkuan gjërat nuk jam i kënaqur, s’jam i kënaqur sepse në Ulqin gjetëm një situatë jo fort të mirë. Ishte shumë ftohtë, kishte erëra të forta dhe në 3 apo 4 ditët e para të përgatitjeve e vuajtëm shumë dicka të tillë, pasi moti i keq nuk na dha mundësi fare për t’u stërvitur.
Kohë nuk kemi fare sepse kampionati rifillon pas disa ditësh. E kam thënë edhe më përpara që këto dy faza do të jenë shumë më të vështira se dy fazat e para për shumë arsye që tashmë dihen dhe nuk ka nevojë që t’i përsëris, pasi të gjithë e marrin me mend se si funksionon kështu që në këto kushte, të them të drejtën kam pritur që edhe ekipi të përforcohet, por kjo nuk është bërë e mundur.
Kam pritur nga klubi që më të afrojnë lojtarë, por realisht ka ardhur vetëm një futbollist me ngjyrë nga Belgjika që është mbrojtës i majtë, dhe asnjë lojtar tjetër, ndërkohë që kundërshtarët tanë janë forcuar ndjeshëm, pasi edhe ekipi më i dobët është përforcuar me 3 apo 4 lojtarë dhe në këto kushte kjo nuk është një situatë e mirë për ne.
Megjithatë unë kam besuar te këta djem, vazhdoj të besoj. Nëse do të tregohemi seriozë si në pjesën më të madhe të dy fazave të para të kampionatit, nuk do e vendosim në diskutim mbijetesën, kjo është e vetmja gjë që mund të them për momentin”, ka përfunduar për Supersport, trajneri Armando Cungu.
