Ditën e sotme në stërvitjen e Romës në Trigoria është parë edhe Nicolo Zaniolo. 23 vjeçari është stërvitur veçmas shokëve të ekipit, ndërsa e ardhmja e tij nuk mori formën që ai dëshironte.
Në orët e fundit të merkatos u përfol për një largim thuajse të sigurtë drejt Premier League tek skuadra e Bournmouth, po ka qenë vetë klubi që nuk ka dashur në fund ta afrojë lojtarin.
Para disa ditësh trajneri i Romës, Mourinho foli për të dhe u shpreh se ai nuk dëshiron të ndërtojë një projekt tek verdhekuqtë me lojtarë që nuk kanë dëshirë ta veshin fanellën.
Zaniolo ishte shprehur më herët se dëshironte një largim nga Roma, për të vazhduar karrierën diku tjetër. Milani nuk e mori “përsipër” një transferim të romanistit dhe Zaniolos i mbeti vetëm mundësia e Bournmouth.
Por klubi anglez nuk dëshironte ta sillte djaloshin në ishull, duke parë edhe sjelljen e tij jo profesionale me Romën dhe ndoshta mospërshtatshmërinë me futbollin anglez.
Zaniolo kështu në përfundim të merkatos dhe “luftës së ftohtë” me tifozët e klubin e Romës rikthehet “kokëulur” në stërvitje, i veçuar nga shokët e ekipit, për të cilin ka luajtur 94 ndeshje dhe shënuar 13 gola.
