Mëngjesin e sotëm, Aziz Gruda u nda nga jeta në moshën 60 vjeçare. Ish-futbollisti i Vllaznisë në vitet ’80 nuk ia doli të fitojë betejën me sëmundjen, duke lënë pas shumë kujtime te tifozeria shkodrane. Gruda prej vitesh jetonte në Gjermani, ndërsa ishte ndër të parët që u largua nga Shqipëria në 1992 dhe nuk u rikthye më në Shkodër pas një turneu në Francë.
Në lidhje me këtë humbje, klubi i futbollit Vllaznia ka reaguar me një mesazh ngushëllimi, duke treguar se gjendet pranë familjes në këto ditë të vështira. “Mëngjesin e sotëm është ndarë nga jeta në moshën 60 vjeçare ish- futbollisti i Vllaznisë Aziz Gruda.
Lojtari që ka kontribuar për disa vite me rradhë në sukseset e skuadrës tonë, duke e shpallur edhe kampione atë në sezonin 1991-92, vuante prej kohësh nga një sëmundje e rëndë dhe si rrjedhojë nuk ka mundur dot t’i rezistojë duke i dhënë lamtumirën familjes së tij, por edhe të gjithë njerëzve të njohur në një moshë të re.
Kjo padyshim që është një humbje e madhe edhe për KF Vllaznia, i cili i gjendet pranë familjarëve dhe të afërme të tij në këtë moment të vështirë. I përjetshëm qoftë kujtimi yt Aziz Gruda”, shkruajnë shkodranët.
Loading ...
