Teuta do të luajë ditën e nesërme sfidën e radhës në kampionat ndaj Vllaznisë. Durrsakët pas barazimit ndaj Luftëtarit në transfertë kërkojnë të rikthehen te fitorja që mungon prej 4 ndeshjesh. Ditën e sotme në konferencën për shtyp ka folur dhe trajneri i Teutës, Bledi Shkëmbi.
"Kemi punuar shumë këto dy javë dhe shpresoj që të konkretizohet me sukses në Shkodër. Të kalojmë këtë moment jo të mirë dhe vazhdimësia do të jetë më e thjeshtë. Jemi të qartë dhe e dimë se çfarë duhet të bëjmë. Duket qartë që ne kemi problem në finalizim. Afrohemi në portën kundërshtare, por goli mungon. Kemi folur me lojtarët dhe shpresoj që ta kalojmë më këtë ngërç".
Pauza e kampionatit? "Kemi punuar, një periudhë që na shërbeu,mendoj se do të na vlejë. Në një aspekt, atë të rikuperimit të disa lojtarëve, na ka shërbyer goxha. Por, pas ndeshjes në Shkodër do të jetë përgjigja më e saktë se sa na ka vlejtur kjo periudhë ndërprerje. Kemi punuar me të gjithë lojtarët, jo vetëm me sulmuesit për të riparuar defektet në zonë kundërshtare. Nuk mendoj se vetëm sulmi, I gjithë ekipi duhet që të shkojë te zona kundërshtare dhe të shënojë".
Presioni? "Ekipi normal që e ndien presionin e rezultateve. Nuk ndodhe vetëm te Teuta, por mendoj se edhe në ekipet e tjera ndikon. Ky presion na prish punë. Por unë dhe ekipi mendoj që ta kalojmë sa më shpejtë këtë situatë. Edhe ngërçi i sulmuesve, mendoj se ka të bëj me anën psikologjike të lojtarëve sepse në aspektin kualitativ janë lojtarë cilësorë. Sa më shpejt ta kalojnë këtë ngërç, aq më e thjesht do të jetë për ata".
Vllaznia? "Vllaznia e luan mirë fazën mbrojtëse, kundërshtari ka kualitete dhe është një ekip i mirë. Janë një grup që vendosen mirë në fushë taktikisht. Bëjnë mirë fazën mbrojtëse dhe në kundërsulm janë të rrezikshëm. I kemi marrë masat dhe e njohim kundërshtarin dhe shpresojmë që ne të jemi konkretë në zonën kundërshtare".
Mungesat? "Një trajner do t'i ketë të gjithë lojtarët. Kam respekt për të gjithë lojtarët, por në një ndeshje nuk duhet që të merresh me mungesat, duhet që të gjesh zgjedhjet më të mira që të zëvendësosh lojtarët që mungojnë. Kështu që, unë besoj se ata që do të futen në fushë do të bëjnë më të mirën".
Lexo gjithashtu
