Shkëlqim Muça është nderuar nga presidenti i Republikës, Ilir Meta duke u vlerësuar për kontributin e dhënë në futbollin shqiptar. Ish-lojtari i Kombëtares dhe i Tiranës ka marrë çmimin “Mjeshtër i Madh”.
Kreu i shtetit shqiptar vlerëson maksimalisht Muçën për tonin që i ka dhënë jo vetëm ekipit bardheblu, por edhe skuadrës sonë Kombëtare.
“Për tifozët bardheblu dhe ata kuqezipor jo vetëm, Shkëlqim Muça është padyshim një nga legjendat e futbollit tonë.
Ai hyri me meritë në historinë e sportit shqiptar, si truri, dirigjenti dhe protagonisti i shumë arritjeve të “17 Nëntorit” dhe Ekipeve Kombëtare, duke nisur me suksesin si titullar me “Shpresat” në 1981, si kampionë të Ballkanit, për të vijuar me disa tituj Kampion dhe Kupa Republike me “Tironën vija-vija”.
Jashtëzakonisht i talentuar dhe virtuoz me topin, asistues brilant, i dalluar për fantazinë në fushën e blertë, sulmues befasues dhe gjuajtës rezultativ, Shkëlqim Muça u kthye në burim frymëzimi për gjeneratat e reja të futbollistëve.
Sportdashësit e viteve ’80 e mbajnë mend shumë mirë kur bashkohej në sulm me Mingën dhe Kolën, treshja e papërballueshme për kundërshtarët, që shënoi rreth 400 gola, nga të cilat 87 vetë Muça.
Pa harruar kontributin e tij të vyer në fitoren 2-0 me Belgjikën e madhe të asaj kohe, ku padyshim ai mbajti një peshë shumë të madhe.
Në vlerësim të talentit, kontributit dhe rezultateve të larta të arritura, si futbollist e si trajner, duke nderuar fanelën bardhë e blu dhe ngritur lart emrin e Shqipërisë në arenën ndërkombëtare sportive, kisha sot kënaqësinë e veçantë të nderoj Shkëlqim Muçën, me Titullin “Mjeshtër i Madh”, shkruhet në faqen zyrtare të presidentit të Republikës, Ilir Meta.
Loading ...
