Kamza do të luaj ditën e nesërme sfidën e radhës në kampionat ndaj Tiranës. Ndeshja e parë për këtë vit për ekipin e drejtuar nga Ernest Gjoka u mbyll me humbjen 2-1 ndaj Vllaznisë e vlefshme për Kupën e Shqipërisë. Përpara sfidës së radhës në koferencën e zakonshme ka folur trajneri i skuadrës Ernest Gjoka i cili foli për gjendjen e skuadrës si dhe sfidën ndaj Tiranës
"Ndeshja e nesërme është shumë e rëndësishme, si për ne, si për kundërshtarin. Parashikoj një lojë të fortë dhe, skuadra që do të gabojë më pak, do të jetë më e qetë, do të marrë maksimumin. Ne vijmë nga humbja me Vllazninë në Kupë, por këtë nuk e shikoj si diçka tragjike. Mendoj se ishte një ndeshje, që deri diku e intepretuam mirë. Po të mos ndodhte ai gabim njerëzor nga portieri, ne do të kishim marrë atë që kërkonim.
Duhet të jemi mirë, sidomos nga ana psikologjike nesër, që ta menaxhojmë ndeshjen me Tiranën. Kundërshtari është shumë i fortë, që ka një emër të madh në futbollin shqiptar, por në këto momente jemi të dyja palët në situatë jo të mirë. Ai që do të jetë më i qetë dhe do t'i bëjë detyrat ashtu si duhet, do t'ia dalë me sukses. Në futboll, gjërat janë të lidhura. Çdo situatë, çdo problem, sado i vogël, ndikon në anën psikologjike të skuadrës.
Unë mendoj se si ne, edhe Tirana, nga ana psikologjike nuk jemi shumë mirë. Kjo është një luftë, në thonjëza, që ne të bëjmë sa më mirë për vazhdimësinë e skuadrës. Kemi punuar mirë këtë javë, futbollistët i dinë problematikat, e dinë se si funksionon ky kampionat, kështu që shpresoj e besoj që ta kthejmë gjithçka në forcë e reagim. Uroj të bëjmë një start të mirë të dy fazave të fundit.
Formacioni? Presim rikthimin e Plakut, i cili, përveçse një futbollist shumë i mirë, është një person që i përcjell frymë pozitive grupit. Sot është testi i fundit i tij, nëse Sebino e kalon me sukses, do ta kemi në formacion. Merkatoja e dimrit? Po të kemi parasysh katërshen e fundit të klasifikimit, nuk mendoj se jemi larg përforcimeve që kanë bërë rivalët tanë. Ndodhemi në të njëjtat ujra, duke pasur parasysh se jemi një skuadër modeste.
Me mundësitë që kemi, jemi munduar të përforcohemi. Edhe kundërshtarët tanë nuk është se kanë bërë merkato të jashtëzakonshme. Jemi po të njëjtët. Luftëtarit i kanë ikur disa lojtarë shumë të rëndësishëm, ndërsa Tirana nuk ka bërë ndonjë afrim. Kamza nuk ka pasur problem përforcimet në dy fazat e kaluara, por dëmtimet e shpeshta të lojtarëve. Këto dëmtime kanë prekur lojtarët shqiptarë dhe pikat kryesore të skuadrës. Me pak fat, pra të mos kemi më dëmtime, mendoj se Kamza është e kompletuar.
Të gjithë duan më të mirën në merkato, por duhet të jemi me këmbët në tokë dhe të shohim cilat janë mundësitë. A e meritojmë vendin në renditjen aktuale? Në futboll, çfarë të mbjellësh, atë edhe do të korrësh. Kamza nuk ka bërë shumë mirë, ndaj është këtu. Unë shpresoj që tashmë çdo gjë të funksionojë mirë dhe të marrim rezultate pozitive për atë cilësi që kemi në skuadër. Të fokusohemi të grupi që kemi, të japim maksimumin, kështu që nuk pres surpriza nga ditët e fundit të merkatos së dimrit".
Lexo gjithashtu
