Kukësi nuk arriti të ruante hapin e Partizanit ditën e sotme duke u mundur nga Tirana me rezultatin 0-1. Një gol I Albi Dokës në minutën e 86-të i dha fitoren bardhebluve. Një fitore me shumë vlera duke konfirmuar formën e mirë që po kalon Tirana në vitin 2019 dhe duke u shkëputur më shumë nga zona e ftohtë e renditjes. Një 3 pikësh që padyshim ka gëzuar jo vetëm tifozët bardheblu, por edhe ata të Partizanit që ditën e sotme, si rrallëherë kanë bërë tifo për rivalin e tyre më të urryer. Madje në stadiumin e Kamzës ka patur dhe tifozë të Partizanit që kanë bërë tifo për Tiranën.
Tashmë me këtë fitore diferenca mes Partizanit dhe Kukësit shkon në 8 pikë dhe Tirana i jep një ”asist” Partizanit në fitimin e titullit kampion. Pas ndeshjes ndaj Kukësi, trajneri Mema u shpreh se kjo fitore nuk ishte një ”nder” për ”demat e kuq”, pasi Tirana do të luaj për fitore edhe ndaj Partizanit që mund të kthehet në ”nder” për Kukësin.