Rikthimi në Kategorinë Superiore pas katër viteve ka vendosur në lëvizje drejtuesit e Luftëtarit që synojnë të ndërtojnë një skuadër për të luftuar si e barabartë mes skuadrave më të mira të vendit. Projekti i klubit synon shtrirjen në një afat të gjatë kohor me rritjen graduale të ekipit gjatë viteve në vazhdim. Rinovimi i kontrtatave me disa nga titullarët e sezonit të shkuar ishte vetëm hapi i parë për skuadrën që momentalisht është pa staf drejtues. Trajneri Gerd Haxhiu është larguar nga drejtimi dhe presidenca po punon për emrin që do të marrë frenat e skuadrës.
Sipas burimeve nga klubi, objektiv parësor mbetet një trajner i huaj dhe janë disa emra të cilët po vlerësohen. Plani B mbetet një emër shqiptar por vendimi përfundimtar do të merret në fillimin e muajit Korrik. Përsa i përket lojtarëve ende në pikëpyetje, emri më i lakuar është sulmuesi vlonjat, Dejvi Bregu i cili nuk ka hedhur ende firmën por sipas të gjitha gjasave pritet të rinovojë kontratën për të paktën edhe një sezon. Lojtari i krahut të majtë është një prioritet në kampin gjirokastrit pasi ai rezultoi vendimtar në pjesën e dytë të sezonit në Kategorinë e Parë.
Puna vazhdon edhe për kompletimin e reparteve të tjera dhe sipas klubit, prioritet janë lojtarët e huaj. Kërkimet janë përqëndruar në Greqi për afrimin e gjashtë futbollistëve uruguajanë dhe argjentinas të cilët do të testohen në fillim të muajit Korrik dhe më pas do të vendoset për të ardhmen e tyre. Deri në kompletimin e skuadrës bluzi, Luftëtari mbetet një kantier ndërtimi pasi në kampin gjirokastrit synojnë të nisin një cikël të ri.
