Michael Ngoo ka rifituar statusin e titullarit dhe liderit te Tirana bashkë me Edon Hasanin. Sulmuesi anglez e ka nisur 2019 në mënyrë më të mirë duke regjistruar në dy takime (Flamurtarit në Kupë dhe Kamzës në kampionat) 3 gola. Sulmuesi ndihet totalisht i rilindur pasi vuajti ndëshkimin nga klubi dhe trajneri Mema në fazën e dytë të sezonit duke i dhënë garanci tashmë skuadrës për vazhdimin e sezonit.
26-vjeçari anglez ndihet i uritur për rezultate pozitive. Në një prononcim për “Supersport” para sfidës së të premtes me Teutën, Ngoo theksoi edhe njëherë se shkak i mosmarrëveshje me teknikun Mema ka qenë koha e pakët që ata u njohën në fillim, por tashmë të dy kanë rifituar besimin e njëri-tjetrit. Nga ana tjetër, bomberi anglez thekson se bardheblutë mund të sigurojnë trofe këtë sezon, duke iu referuar ecurisë së mirë në Kupën e Shqipërisë, ku 24-herë kampionët e Shqipërisë janë me një këmbë në fazën çerekfinale pas fitoren në takimin 2-0 në kryeqytet ndaj Flamurtarit.
“Paraqitjet mbresëlënëse? Kur psikologjikisht ndihesh mirë, atëherë këtë gjë e reflekton edhe në fushë. Jam i përqendruar për të ndihmuar skuadrën. Këto janë gjërat që kanë ndryshuar te unë kohën e fundit, pasi ndihem mirë dhe po mundohem të bëj më të mirën..
Vendosja e paqes me teknikun Mema? Kur takon dikë për herë të parë, të nevojitet pak kohë për t’u njohur me të. Mema është një trajner i zoti dhe jep më të mirën për skuadrën, siç edhe unë dua të jap më të mirën time për Tiranën. Ndonjëherë në karrierën e një futbollisti ndodh që të merren vendime të gabuara, këto janë gjëra që i kam lënë pas dhe tani situata po ecin mirë. Tirana gjithashtu po arrin të fitojë dhe kjo është diçka pozitive.
Vitin e ardhshëm sërish bardheblu apo…? Tirana është një qytet i bukur, gjithashtu dhe kjo skuadër është me histori dhe traditë. Për momentin nuk e di se çfarë do të ndodhë në të ardhmen, por mund t’ju them se tani jam totalisht i fokusuar për të bërë maksimumin për këtë skuadër në çdo ndeshje. Nëse bën e mirë e di se çfarë do të ndodhë edhe në të ardhmen.
Sfida me Teutën dhe Kupa e Shqipërisë? Teuta është një skuadër e fortë dhe ka një sulm të rrezikshëm. Gjithsesi unë jam gati të luaj kundër tyre dhe sigurisht t’u shënoj. Ne duam të fitojmë çdo kompeticion ku marrim pjesë. Dy fazat e para nuk shkuan mirë për ne, por tani kemi rikuperuar disi dhe shpresojmë të vazhdojmë kështu. Në Kupë, nëse vazhdojmë të fitojmë çdo ndeshje,dihet fundi”, përfundon 26-vjeçari Ngoo.
