Kategoria e Parë rikthehet këtë javë për gjysmën e dytë të sezonit. Në Grupin A, Vllaznia është kandidati kryesor për t’u ngjitur në Superligë sezonin e ardhshëm. Sfida e radhës për shkodranët është ndaj Erzenit që gjithashtu pretendon Kategorinë Superiore. Në koferencën para ndeshjes ka folur trajneri Lika, i cili foli për sfidën ndaj Erzenit, merkaton dhe objektivat e klubit.
Sfida e radhës? “E kemi vlerësuar maksimalisht këtë ndeshje dhe do hyjmë në fushë me objektivin e vetëm për të marrë maksimumin prej saj. Erzeni është një nga ekipet më të mira të grupit tonë dhe kuptohet ka edhe ai pretendimet e veta, megjithatë edhe ne kemi tonat. Nuk e konsiderojmë një takim përcaktues për të ardhmen e Vllazninë, ndoshta më shumë është përcaktues për Erzenin”.
Merkato? “Kemi marrë dy lojtarë gjatë kësaj periudhe, një me përvojë siç është Kruja dhe një tjetër, një element të ri nga Nigeria i cili është vëzhguar nga drejtuesit e klubit dhe shpresoj të na shërbejë për të ardhmen”.
Objektivat e skuadrës? “Skuadra është e plotësuar dhe besoj se do ia dalim të arrijmë objektivin që kemi me kontingjentin aktual të futbollistëve”.