Vllaznia do të presë nesër në "Loro Boriçi" skuadrën e Teutës për të zhvilluar sfidën e parë të çerekfinaleve të Kupë së Shqipërisë.
Për mbrojtësin Ditmar Bicaj, ky është një takim shumë i rëndësishëm, ndërsa lojtari që konsiderohet si lideri i repartit të prapavijës te shkodranët pranon se një fitore 1-0 në Shkodër do të ishte një hap i rëndësishëm drejt kualifikimit për në gjysmëfinale.
Sfida ndaj Teutës është shumë i rëndësishëm për ne. Luhet me dy takime, por meqë ndeshja e parë është në Shkodër, kuptohet që na e shton më shumë përgjegjësinë.
Rëndësi ka që të mos pësojmë gol në këtë ndeshje, pastaj të shohim përpara. Mendoj se duhet të jemi të kënaqur edhe me 1-0 këtë herë.
Kupa është një objektiv shumë i rëndësishëm për ne dhe synimi i klubit besoj se është për të kaluar në finale. Vllaznia ka treguar se mund të zhvillojë lojëra të mira, kjo ndodhi edhe me Kukësin, ku vërtetë humbëm në fund, por të gjithë janë të vetëdijshëm se fitorja na takonte ne.
Që i vogël jam befasuar gjithnjë nga mënyra si tifozët shkodranë e mbështesnin Vllazninë. Tani janë larguar disi nga shkallët e stadiumit, megjithatë nuk e kuptoj arsyen pse ka ndodhur kështu.
Shpresoj shumë që nesër të jenë më të shumtë në shkallët e stadiumit për të na mbështetur. Sa i takon kampionatit, Vllaznia nuk besoj se rrezikon.
Duhet të bëjmë shumë kujdes dhe t’i marrim ndeshjet një e nga një, duke nisur nga transferta e radhës me Partizanin, me të cilin kemi zhvilluar lojëra të mira këtë sezon dhe kemi marrë edhe rezultate pozitive. Pse jo, të mos ndodhë edhe këtë herë kështu”, – është shprehur Bicaj në konferencën për shtyp ditën e sotme.
Lexo gjithashtu
