Lajmi i kobshëm për ndarjen nga jeta të Fatmir Frashërit ka mbërritur dhe në Kosovë. Ka qenë pikërisht kreu i FFK-së, Agim Ademi ai që në emër të saj ka dashur t’i shpreh ngushëllimet FSHF-së ,klubit të Tiranës dhe familjes Frashëri.
Në letrën e dërguar presidenti i federatës kosovare të futbollit shpreh konsideratën e tij më të lartë për Frashërin si legjendë e futbollit mbarëhqiptar dhe gjithashtu ngushëllon të gjithë të afërmit për një njeri që ka lënë gjurë në futbollin shqiptar. Kujtojmë se legjenda bardheblu u nda nga jeta pas një beteje me një sëmundje të rëndë në moshën 79- vjeçare.
Letra e ngushëllimit nga FFK-ja
Letër ngushëllimi për familjen Frashëri, KF “Tirana” dhe FSHF-në
Prishtinë, 19 korrik 2019
E nderuara familje e Fatmir Frashërit!
Të nderuar drejtues dhe dashamirë të KF “Tirana”
I nderuari president Armand Duka dhe anëtarë të FSHF-së
Me dhimbje të thellë e morëm lajmin për ndarjen nga jeta të legjendës së futbollit shqiptar, Fatmir Frashëri, andaj në këto momente të vështira për ju, më lejoni që në emrin tim, KE të FFK-së, klubeve dhe të gjithë komunitetit të futbollit në Kosovë, të ju shpreh ngushëllimet tona më të sinqerta për humbjen e njeriut që i dha shumë klubit Tirana, Kombëtares dhe futbollit shqiptar në përgjithësi.
Fatmir Frashëri ka lënë gjurmë të mëdha si futbollist në periudhën 1950-1970, derisa më pas kontributin e tij e dha edhe si trajner dhe president klubi, prandaj vepra e tij do të nderohet jo vetëm në Shqipëri, por edhe në Kosovë e trojet tjera shqiptare.
Familja e humbi njeriun më të dashur, derisa futbolli shqiptar humbi një legjendë, i cili gjithmonë do të kujtohet si i tillë.
U prehtë në paqe shpirti i tij!
Loading ...
