Lajmi i fundit/ Ndryshime të rëndësishme në Superligë, FSHF detyron klubet të shpenzojnë për diçka të re

Ndryshimet janë të pranishme në çdo sezon të Kategorisë Superiore. Që nga stadiumet, sallat e mediave, e drejta televizive apo dhe ndryshime të tjera, të cilat ju kanë kushtuar jo pak skuadrave tona që kanë arritur brenda disa viteve të bëjnë revolucion dhe të ketë një pamje të re dhe një prezantim të ri dhe dinjitoz për një kampionat që po njeh rritje në çdo aspekt.

Logo zyrtare e Kategorisë Superiore për sezonin 2016-2017

Së fundmi, nga zyra e marketingut të FSHF-së bëhen me dije ndryshimet që do të ketë Superiorja këtë sezon. Ajo do të jetë e njëjtë si kampionatet më në zë të Europës për sa i përket logove dhe dizajnit të fanellave.

Në krahun e djathtë fanellat e çdo skuadre në Kategorinë Superiore do të kenë të stampuar logon e Kategorisë Superiore për sezonin 2016-2017, ndërsa në këtë rrugë është dhe Kupa e Shqipërisë, e cila do të ketë dhe ajo logon e saj zyrtare.

Por, ndryshimet pritet që t’iu parashtrohen klubeve dhe të miratohen brenda kësaj jave. Ato pritet që të bëhen publike nga FSHF-ja, e cila do t’ua shpërndajë logot klubeve kundrejt një pagese. Por, FSHF-ja po punon për idenë e logove që nuk kanë kosto dhe që nuk i bëjnë klubet të shpenzojnë shumë, sepse në kampionatet e huaj, fanellat mund të ndërrohen në çdo ndeshje, gjë që te klubet tona nuk ndodh për shkak edhe të buxhetit që kanë.