Lajme të mira në kampin shkodran, vjen garancia financiare

Vllaznia ka marrë një lajm të mirë ditën e sotme. Këshilli Mbikëqyrës i shoqërisë aksionere Vllaznia kanë garantuar financat për sezonin e ri 2016-2017. Gjithashtu ata kanë mbështetur punën e bërë deri më tani nga trajneri Armando Cungu.

“Mesditën e sotme është zhvilluar mbledhja e rradhës e Këshillit Mbikëqyrës të shoqërisë aksionere Vllaznia. Kanë marrë pjesë në të, pesë anëtarët e këtij Këshilli si dhe administatori i klubit Astrit Gjyrezi. Ka asistuar në këtë mbledhje edhe kryetarja e Bashkisë Shkodër, zj. Voltana Ademi. Axhenda e kësaj mbledhje të rradhës ka përfshirë pesë pikë teksa është bërë shqyrtimi i bilanceve financiare të klubit për vitet 2014 dhe 2015, raporte këto të përgatitura nga eksperti kontabël. Po ashtu, është diskutuar rreth draftit të statutit të KF Vllaznia sh.a, ndërsa pika e tretë e rendit të ditës ka qenë diskutimi rreth strukturës administrative të klubit, përfshi këtu edhe strukturën e Akademisë. Pika 4 ka përfshirë një informacion të administratorit të klubit rreth ecurisë së deritanishme të skuadrës, ndërkohë që në pikën e pestë, atë të çështjeve të ndryshme, sigurisht që anëtarët e Këshillit Mbikëqyrës janë ndalur tek sezoni i ri. Ata përveçse kanë garantuar anën financiare të klubit për sezonin e ri, janë ndalur në gjëra më konkrete teksa kanë mbështetur punën e stafit teknik në vazhdimësi, kryesisht në përgatitjet për fazën e parë të kampionatit. Kjo si në aspektin e zhvillimit të një faze përgatitore në kushte komode ashtu edhe në motivimin dhe mbështetjen e stafit për të gjetur lojtarë cilësorë në merkato në mënyrë që përbërja e skuadrës në sezonin e ri të jetë ajo që pritet”, shkruhej në njoftimin zyrtar të klubit shkodran.