Kukësi po bëhet gjithmonë e më tepër një klub europian, duke investuar në të gjithë aspektet. Imazhi është një çështje e rëndësishme dhe këtë e kanë shumë të qartë tashmë drejtuesit e tij. Skuadra verilindore ka prezantuar fanellat e reja pak minuta më parë dhe e veçanta është se ato janë të firmës “Macron”, që është njëkohësisht edhe kompania e uniformave të Kombëtares së Shqipërisë. Presidenti Safet Gjici, nën shoqërinë e lojtarëve Izair Emini dhe Matija Dvornekoviç, ka treguar para medieve fanellat që do të veshë klubi i tij në Europa League, në ndeshjen kundër skuadrës së Rudarit nga Mali i Zi.
