Komisioni i Displinës rrëzon Partizanin në Kategorinë e Dytë

Ndeshja e fituar nga Partizani kundër Sopotit në fazën “play-off” u përfol shumë për faktin se të kuqtë aktivizuan lojtarë që kishin luajtur një ditë më parë në Superiore. Çështja u zgjerua aq shumë saqë shkoi në zyrat e deputetëve deh ministrave, pasi në FSHF nuk po i jepnin zgjidhje të menjëhershme. Ndërsa sot ka ardhur dhe vendimi përfundimtar nga ana e Komisionit të Disiplinës, i cili ka shqyrtuar materialin dhe ka vendosur që Sopoti të qëndrojë në të Parën dhe Partizanit B të vazhdojë të luajë në të Dytë, pasi aktivizoi lojtarët në dy ndeshje pa kaluar 24 orë.

Lidhur me kërkesën e paraqitur nga KF “Sopoti” rezulton që shkelja e pretenduar nga ana e KF “Partizani B” është konsumuar. Kjo për faktin se në bazë të vendimit Nr.3 datë 11.11.2013 të Komiteti Ekzekutiv të FSHF është përcaktuar se nuk lejohet aktivizimi i lojtarëve që kanë luajtuar me ekipin e parë brenda 24 orëve nga zhvillimi i asaj ndeshje. Në rastin konkret, nga përmbajtja e procesverbaleve të ndeshjeve rezulton se lojtarët Labinot Ibrahimi dhe Ylber Ramadani janë aktivizuar në datën 18.05.2016 në ndeshjen Partizani – Teuta të Kategorisë Superiore dhe në datën 19.05.2016 janë aktivizuar në ndeshjen KF Sopoti – Partizani B.

Nga ana tjetër konstatohet fakti që në Rregulloren e Aktivitetit të sezonit 2015 – 2016 për Kategorinë e Parë dhe Kategorinë e Dytë, në publikimin e bërë nga ana e FSHF, nuk rezulton të jetë pasqyruar kjo vendimmarrje e Komitetit Ekzekutiv. Çka bën që në vështrim të tekstit të publikuar në përmbajtje të këtyre rregulloreve shkelja e pretenduar të jetë realizuar pa faj nga KF “Partizani B”. Pavarësisht këtij aspekti, nisur nga fakti që vendimet e Komitetit Ekzekutiv janë të detyrueshme dhe mbizotërojne mbi përcaktimet e tjera që bien në kundërshtim me to, kërkesa e KF “Sopoti” gjendet e drejtë dhe e bazuar në rregullore.

Për sa më sipër, meqënëse janë aktivizuar lojtarë të cilët nuk kishin të drejtë të luanin, Komisioni i Disiplinës

                                   VENDOSI:

1.Pranimin e kërkesës së KF “Sopoti”.

2.Anullimin e rezultatit të ndeshjes KF “Sopoti” – “Partizani B” e vlefshme për “Play Off”, zhvilluar më datë 19.05.2016.

3.Bazuar në nenin 54 të KDS për aktivizim të lojtarëve që nuk kishin të drejtë të luanin, ndeshja KF Sopoti” – Partizani B e vlefshme për “Play off” i jepet fitorja në tavolinë me rezultatin 3 – 0 ekipit KF “Sopoti”.

Kundër vendimit mund të bëhet ankim brenda 3 (tre) ditëve në Komisionin e Apelit.