Korabi është në një periudhë mjaft të vështirë në Superligë, por forma e dobët nuk i ka demoralizuar lojtarët dibranë. Të besuarit e Gerd Haxhiut, presin në shtëpi Tiranën ditën e shtunë në orën 14:00 në kuadër të javës së 24 të Superligës.
Sulmuesi, Paolo Ivani, i formuar në shkollën e mjeshtërisë së Tiranës, ka folur në lidhje me takimin e radhës.
“Synimi im është që për aq minuta sa kam në dizpozicion, të jap më të mirën time. Është normale që nëse e nis ndeshjen si titullar ndihesh mjaft i vlerësuar dhe përpiqesh të japësh maksimumin.
Tirana është një ekip i fortë, por nuk po kalon një moment të mirë. Përsa i përket ndeshjes, mund të them që shumicën e lojtarëve që aktivizohen aty uin i njoh dhe kam luajtur kundër tyre që te grup-moshat.
Korabi, ashtu si në çdo ndeshje, edhe ndaj Tiranës do të mundohet të zhvillojë ndeshje të bukur. Motivimi përballë një kundërshtari të tillë është maksimal dhe besojmë se mund t’ia dalim për të marrë pikë”, është shprehur Ivani.
